An Accident in Broad Daylight || ဘာသာပြန်《Completed》

Chapter 29

ရွှီထန်းချန်က သူ၏ဖုန်းခေါ်မှုများကို မကြာခဏ မကိုင်ချိန်မှစ၍ ရိကျယ်မှာ သူအလွန်ဖိအားပေးမိကာ နားပူနားဆာလုပ်မိပြီလားဟု တွေးနေမိ၏။ရွှီထန်းချန်၏ နေ့စဥ်စာသင်ကြားမှုနှင့်အလုပ်တို့ကို နှောင့်ယှက်မိမည်အား ကြောက်ရွံ့သဖြင့် ဖုန်းခေါ်ဆိုမှုများကို ရပ်တန့်လိုက်ပြီး ရံဖန်ရံခါသာ ပုံမှန်ထမင်းစားရန် သတိပေးသည့်စာတိုများ ပေးပို့ခဲ့လေသည်။

တစ်ခါတစ်ရံတွင် ရွှီထန်းချန်သည် အလွန်လျင်မြန်စွာ ပြန်ဖြေလာတတ်၏။တစ်ခါတရံ အချိန်အတော်ကြာမှသာ ပြန်ဖြေတတ်ပြီး စောစောကထမင်းစားပြီးကြောင်းနှင့် ဆရာ့ထံသတင်းပို့နေရသဖြင့် ဖုန်းကိုမကြည့်မိကြောင်း
ပြောလာတတ်၏။

ရိကျယ်ကတော့ ပြန်ဖြေသည့်စာ
နှောင့်နှေးသည်ကို ဂရုစိုက်မနေခဲ့ပေ။သူ၏ အခြေအနေအပေါ် နားလည်မှုက လေးနက်မှုမရှိဘဲ ရိုးရှင်းကာ ၎င်းထက်ဘာမှပိုမနေခဲ့ပေ။မကြာမီက ရွှီထန်းချန်မှာအနားယူခဲ့ခြင်းကြောင့် ယခုတော့အလုပ်ကိုပို၍ ကြိုးစားလုပ်နေရ၏။ထိုမှသာ ဆောင်းရာသီအားလပ်ရက်မတိုင်မှီ ပြီးမြောက်ရန်လိုအပ်သည်များကို ပြီးမြောက်နိုင်ပေလိမ့်မည်။ရိကျယ်အတွေးနိုင်ဆုံးအရာက သူ့ကိုမက်ဆေ့ခ်ျပို့ခြင်းသာ။

'ကျွန်တော်ကူညီနိုင်တာများ ရှိသေးလား?'

သူတို့နှစ်ယောက် စူပါမားကတ်သို့ အတူတူသွားသည့် ထိုနေ့မှသာ သူသိလိုက်ရတော့သည်။၎င်းမှာ တကယ့်ကိုရှောင်နေခြင်းပင်။

ရိုးရာပြက္ခဒိန်နောက်ဆုံးလ၏ နှစ်ဆယ်ရက်မြောက်နေ့ဖြစ်နေပြီဖြစ်သော်လည်း မသိနိုင်သော အကြောင်းရင်းတစ်ခုကြောင့် အပူချိန်က ရုတ်တရက် ဒီဂရီအနည်းငယ်မျှတက်လာခဲ့၏။အတော်လေးနွေးထွေးပြီး လေလည်းမတိုက်ပေ။

အထူးသဖြင့် ရွှီထန်းချန်၏ခန္ဓာကိုယ်ကအားနည်းနေပြီး တစ်ပတ်နီးပါးခန့် ဓါတ်ခွဲခန်းထဲတွင် သာ ရက်ပေါင်းများစွာ ဆက်တိုက်ထိုင်နေရသောကြောင့် ဤရာသီဥတုသည်
အပြင်ဘက်သို့ လမ်းလျှောက်ထွက်ရန် အလွန်သင့်တော်သည်ဟု ရိကျယ်တွေးခဲ့မိလေသည်။ထိုသို့ထိုင်နေခြင်းက သူ့ကျန်းမာရေးအတွက် တကယ်ကို မကောင်းပေ။စီစဉ်ပြီးနောက် ရိကျယ်သည်ရွှီထန်းချန်ကို စောင့်ဆိုင်းရန်ဓာတ်ခွဲခန်းသို့ သွားခဲ့၏။