An Accident in Broad Daylight || ဘာသာပြန်《Completed》

Chapter 12

Lunar နှစ်သစ်ကူးရောက်သည်နှင့် ရွှီထန်းချန် ၏အိမ်တွင် လုပ်ရမည့်အလုပ်များ အဆမတန် တိုးလာခဲ့တော့သည်။ကျိုးဟူနှင့်ရွှီယွဲ့လျန်တို့သည် ရှေးရိုးစွဲသူများဖြစ်ကြပြီး နှစ်သစ်ကူးကာလတွင် လုပ်သင့်လုပ်ထိုက်သောလုပ်ထုံးလုပ်နည်းများထဲမှ တစ်ခုကိုမှချန်လှပ်မထားခဲ့ကြပေ။

နွေဦးရာသီသန့်ရှင်းရေး၊နှစ်သစ်ကူးပစ္စည်းဝယ်ခြင်း၊ဆွေမျိုးမိတ်သင်္ဂဟများ လာလည်ခြင်း......အခြေခံအားဖြင့် ရိုးရာပြက္ခဒိန်၏ ဆယ့်နှစ်ခုမြောက်လတွင် သူပြန်လာသည့်နေ့မှစ၍ နှစ်သစ်ကူးသတ္တမမြောက်နေ့အထိ သူ့မိသားစုသည် အစီအစဉ်များစွာပြုလုပ်ခဲ့ကြလေသည်။

ကျိုးဟူသည် ငှားရမ်းထားသောသန့်ရှင်းရေးဝန်ထမ်းများက ကောင်းစွာ မသန့်ရှင်းနိုင်ဟုခံစားနေရချိန်တွင် ရွှီထန်းရှီနှင့် ရွှီယွဲ့လျန်တို့ကတော့ ဖုန်မှုန့်များကို ခံနိုင်ရည်မရှိကြ။ထို့ကြောင့် ရွှီထန်းချန်မှာတော့ ကျိုးဟူနှင့်အတူ နွေဦးသန့်ရှင်းရေးတာဝန်များကို ထမ်းဆောင်ခဲ့ရတော့သည်။

"ညာဘက်ထောင့်ကို သတင်းစာနဲ့ ပွတ်လိုက်
ဟိုမှာ အစွန်းအထင်းတစ်ခုတွေ့နေရတယ်... ဟုတ်ပြီ ဟုတ်ပြီ အခုသန့်ရှင်းသွားပြီ"

"ဆိုဖာကိုရွှေ့ပေးပါဦး အောက်ဘက်ကိုသန့်ရှင်းရမယ်..."

"မနက်ဖြန်မနက် အိပ်ရာကနိုးရင် လိုက်ကာတွေကိုဖယ်လိုက်နော် တစ်မနက်လုံးအမေလျှော်ထားလိုက်မယ် ငါတို့အဲ့တာကိုနှောင့်နှေးနေလို့မရဘူး မဟုတ်ရင် ငါတို့ဆိုဖာအခင်းတွေလျှော်ဖို့အချိန်မရှိပဲနေမယ်"

ကျိုးဟူတွင် တိုက်ခိုက်ရေးစိတ်ဓာတ်အပြည့်ရှိနေလေသည်။ တစ်ဖက်တွင်တော့ နွေဦးသန့်ရှင်းရေး၏ ရက်အနည်းငယ်ကြာပြီးနောက် ရွှီထန်းချန်သည် အလွန်ပင်ပန်းလွန်းသဖြင့် အိပ်ရာပေါ်တွင် ခြေပစ်လက်ပစ်လဲလျောင်းနေကာ အချိန်အတော်ကြာမထနိုင်တော့။

ရွှီထန်းရှီက သူ့နောက်ကျောကိုနှိပ်နယ်ပေးရင်း သူမ၏နှလုံးသားလေးမှာ အစ်ကိုဖြစ်သူအတွက် နာကျင်နေလေသည်။သူမက နူးညံ့သောအသံလေးဖြင့် မပျော်မရွှင်ဖြစ်စွာညည်းညူလာခဲ့၏။