លង់ស្នេហ៍នាយកកម្លោះ (រដូវកាលទី០៨) THE FRUSTRATION [ចប់]

ភាគ០៨

លង់ស្នេហ៍នាយកកម្លោះ
ភាគទី០៨

"អាន់..អាន់ណា?" សំឡេងគ្រលរធំបន្លឺឡើងស្របនឹងក្រសែភ្នែកអ្នកម្ខាងទៀតសំឡឹងមើលមកចំគេ នាងតូចដែលទើបតែចូលមកដល់នោះក៏មើលមកគេព្រមជាមួយនឹងទឹកមុខធម្មតា ខុសប្លែកពីអ៊ែនហ្សូដែលមើលទៅនាងទាំងអារម្មណ៍មួយបែបពិបាកនឹងពន្យល់។
"នេះអ្នកទាំង២ធ្លាប់ស្គាល់គ្នាហេស៎?" សុីសស្ទឺអារ៉ូនីក៏ប្រញាប់សួរនាំភ្លាម ត្បិតគាត់បានលឺច្បាស់ណាស់ថាមុននេះនាយកម្លោះឧទានហៅឈ្មោះក្មេងដែលនៅជាមួយនឹងគាត់នោះ អ៊ែនហ្សូក៏បោះជំហានចូលមកជិតនាងស្របនឹងដៃទាំងសងខាងក្ដាប់ណែន ញើសក៏ហូរស្រឹបៗចម្លែកហាក់ដូចជាការបោះជំហានចូលនោះធ្វើដោយបង្ខំចិត្តអញ្ចឹង។
"អាន់ណាស្គាល់អ្នកកម្លោះខាងនេះដែរហេស៎?"
"អត់ទេសុីសស្ទឺ..ខ្ញុំមិនស្គាល់ទេ ហើយក៏ចាំមិនបានថាធ្លាប់ស្គាល់អីដែរ" ពាក្យថា«ចាំមិនបាន»ដែលអាន់ណានិយាយចេញមកនោះក៏នាំឲ្យអ៊ែនហ្សូព្រលែងខ្យល់ដង្ហើមស្រាលហាក់ដូចជាធូរចិត្តបន្តិចតែគេក៏នៅមានចម្ងល់ខ្លះៗដែរថាមូលហេតុអីបាននាង...មិនចងចាំគេ?
"អញ្ចឹងខ្ញុំសុំសុីសស្ទឺទៅសម្រាកសិនហើយ ធ្វើការពេញមួយថ្ងៃហត់នឿយនឹងចុកដៃជើងខ្លាំងណាស់ លាសិនហើយលោក.." អាន់ណាអោបសុីសស្ទឺបន្តិចរួចក៏អោនគំនាបដាក់អ៊ែនហ្សូបន្តិចមុននឹងចាកចេញទៅបាត់ អ៊ែនហ្សូក៏តាមមើលនាងជាប់ដល់ថ្នាក់សុីសស្ទឺសម្គាល់ដឹង។
"អាន់ណាទើបបញ្ជូនត្រឡប់មកពីបារាំងមួយរយៈមុនប៉ុណ្ណោះ លឺថាខាងគ្រួសារនាងបញ្ជូនមក លោកធ្លាប់នៅទីនោះមែនទេ? មើលទៅលោកដូចជាស្គាល់នាង..."
"អូ! អត់ទេសុីសស្ទឺខ្ញុំប្រហែលជាច្រឡំនាងនឹងមនុស្សដែលធ្លាប់ស្គាល់គ្នាហើយ" អ៊ែនហ្សូក៏និយាយគួរសមទៅកាន់សុីសស្ទឺអារ៉ូនី សុីសស្ទឺក៏ញញឹមរួចបំណងអញ្ជើញគេឲ្យហូបតែនៅទីនោះដើម្បីរង់ចាំខេតធឺរីន តែថាអ្នកដែលត្រូវរង់ចាំនោះក៏មកដល់ល្មម។
"សុីសស្ទឺ.." ខេតចូលមករួចក៏អោបក្រសោបសុីសស្ទឺជាប់ណែន តែភ្នែកក៏ងាកសំឡឹងមើលទៅនាយកម្លោះដែលទើបតែរករឿងនាងមុននោះត្មែរ នេះកុំតែយល់ដល់សុីសស្ទឺដែលខលទៅរកនាងទេ កុំអីនាងមិនមកឡើយ។
"ខេតសុខសប្បាយទេនៀក៎? មើលទៅដូចជាស្គមជាងមុនច្រើនណាស់ណ៎" សុីសស្ទឺអារ៉ូនីក៏កាន់ស្មារបស់ខេតធឺរីនជាប់ណែនព្រមទាំងមើលនាងពីក្បាលដល់ចុងជើងតែម្ដង ខេតក៏ញញឹមស្រស់តបវិញ។
"ខ្ញុំមិនបានស្រកគីឡូទេសុីសស្ទឺ.. គ្រាន់តែខ្ញុំហាត់ប្រាណនឹងណា សុខភាពខ្ញុំនៅល្អដូចដើម សុីសស្ទឺកុំបារម្ភអី.. អញ្ចឹងខ្ញុំសុំលាសុីសស្ទឺសិនហើយ មិននៅរំខានយូរទេ.." ខេតក៏អោបសុីសស្ទឺបន្តិចរួចងាកសំឡក់ទៅកាន់នាយកម្លោះត្រកូលអាល់ម៉ាឌីនោះបន្តិចហាក់ប្រាប់ថាពេលណាទើបចេញមក?
"ខ្ញុំលាសិនហើយសុីសស្ទឺ.."
"ចាស៎តាមសម្រួល.." សុីសស្ទឺអារ៉ូនីក៏សំឡឹងមើលការចាកចេញរបស់ពួកគេរួចក៏លាន់មាត់សើចបន្តិច ត្បិតឃើញថាខេតធឺរីនធ្វើចារិកងរខ្ទើតដាក់នាយនោះតែម្ដង។
"ពួកគេក៏សាកសមណ៎.." ពាក្យសម្ដីនិយាយរបស់សុីសស្ទឺក៏ស្ថិតក្រោមការសំឡឹងមើលពីមនុស្ស២នាក់ដែលនៅទីនោះ ពោលគឺមើលពីជាន់ខាងលើមក។
ពួកគេជានរណា?