លង់ស្នេហ៍នាយកកម្លោះ (រដូវកាលទី០៨) THE FRUSTRATION [ចប់]

ភាគ៤៨,៤៩,៥០

លង់ស្នេហ៍នាយកកម្លោះ
ភាគ៤៨,៤៩,៥០

"ប្រាប់ម៉ាក់តាមដំណើរដើមទងមក.." វត្តមានមនុស្សស្រីចំណាស់ដែលជាចាស់ទុំនឹងជាអ្នកដែលមកឃើញនឹងដឹងពីចំណងមេត្រីភាពរបស់ពួកគេមុនអ្នកណាៗទាំងអស់នោះក៏ព្យាយាមជជីកសួររកចំណុចផ្ដើមនៃស្នេហារបស់ពួកគេ។
សំនួររបស់ស្កាលេតក៏ធ្វើឲ្យអ្នកដែលអង្គុយនៅសាឡុងម្ខាងទៀតនោះសំឡឹងមុខគ្នាទៅមក ខេតធឺរីនដែលខ្លួនជាមនុស្សស្រីកាលបើបានឃើញចាស់ទុំមកឃើញនាងក្នុងសភាពបែបនេះនាងក៏ខ្មាសអៀនរហូតដល់នាងមិនហ៊ានមើលទៅអ្នកមីងស្កាលេតសោះ បានត្រឹមតែអោនមុខចុះជារឿយៗ អ៊ែនហ្សូក៏អាចមើលដឹង។
"ប្រុសហ្សូ?.." កាលបើសួរគ្មានអ្នកណាឆ្លើយស្កាលេតក៏ប្រញាប់សួរទៅកូនប្រុសម្ដង តែនាយក៏ព្រលែងខ្យល់ដង្ហើមធ្ងន់បន្តិចរួចងាកមើលទៅខេតដូចជាឲ្យសញ្ញាដល់ម្ដាយរបស់គេអញ្ចឹង។
"អ្នកម៉ាក់សួរបែបនេះ ខេតអាចនឹងមានអារម្មណ៍មិនស្រួលណា៎.."
"បង..គឺថាអូនមិនអីទេ" ខេតធឺរីនក៏ប្រញាប់ឆ្លើយបដិសេធភ្លាមតែក៏មិនទាន់ពេលព្រោះទឹកមុខបែបដឹងខុសរបស់នាងក៏នាំឲ្យចាស់ទុំមានអារម្មណ៍មិនស្រួលនឹងប្រញាប់នាំខ្លួនចូលមកអង្គុយកៀកក្បែរជាមួយនឹងនាងរួចក្រសោបកាន់ដៃនាងជាប់ណែន ស្កាលេតអង្អែលដៃក្មេងស្រីជាទីស្រឡាញ់ដែលនាងសែនពេញចិត្តតាំងពីជួបនាងលើកដំបូង ទាំងកាយវិការ ពាក្យសម្ដីនឹងការខិតខំរបស់នាងក៏ជាហេតុនាំឲ្យស្កាលេតស្រឡាញ់នឹងតាមមើលនាងរហូត។
"ខេតកុំធ្វើមុខបែបនេះបានទេកូន?" ពាក្យមួយឃ្លាបញ្ចប់ប្រយោគរបស់ស្កាលេតស្ដាប់មើលទៅវាធម្មតាសម្រាប់អ្នកដទៃតែសម្រាប់ក្មេងដែលខ្វះភាពកក់ក្ដៅពីម្ដាយដូចជាខេត វាមានឥទ្ធិពលអាចឲ្យនាងរង្គោះរង្គើចិត្តបានដោយងាយ។
"ខ្ញុំសុំទោស..តែអ្នកមីងអាចនិយាយពាក្យមុននេះម្ដងទៀតបានទេ?" ស្កាលេតក៏ញញឹមរួចចូលមកអោបក្រសោបនាងតូចខេតធឺរីនរួចគោះអង្អែលខ្នងនាងព្រមនឹងវត្តមានអ៊ែនហ្សូចូលមកអង្គុយកៀកក្បែរខេតដូចគ្នាដែរ។
"ខេតធឺរីន..កូនសម្លាញ់ម៉ាក់" ខេតធឺរីនក៏យំចេញមកទាំងមិនបានព្រៀងទុកនាងលូកដៃអោបតបទៅកាន់ចាស់ទុំដែលតែងតែធ្វើឲ្យនាងមានអារម្មណ៍កក់ក្ដៅជារឿយៗតាំងតែពីនាងចូលក្នុងជីវិតរបស់កូនប្រុសគាត់។
"ខ្ញុំ..ហ៊ឹក! ខ្ញុំអាចហៅអ្នកមីងថាម៉ាក់បានទេ? ហ៊ឹកៗអ្នកម៉ាក់" ខេតធឺរីនព្យាយាមត្រសុលអោបក្រសោបអ្នកមីងស្កាលេត អ៊ែនហ្សូឯណោះក៏ញញឹមរួចអោបនាងជាប់ណែនដូចគ្នាដែរ។
"បាន..ប្រាកដជាបានណា៎កូនស្រីម៉ាក់ ម៉ាក់ស្រឡាញ់កូនខ្លាំងណាស់"
"បងក៏ស្រឡាញ់អូន ម្ចាស់បេះដូងបង" ពួកគេទាំង៣នាក់ក៏អោបគ្នាយ៉ាងកក់ក្ដៅនៅឯបន្ទប់ទទួលភ្ញៀវនោះ ខេតធឺរីនដែលនៅកណ្ដាលទទួលការអោបយ៉ាងកក់ក្ដៅនោះក៏បិទភ្នែកស្របនឹងទឹកថ្លាហូរស្រក់ចុះមកព្រោះតែសប្បាយចិត្ត។
(មួយជីវិតនេះខ្ញុំមិនដែលគិតថាខ្ញុំអាចនឹងបានប្រើពាក្យថាម៉ាក់ឡើយ..តែអរគុណអ្នកមីងខ្លាំងណាស់ អ្នកមីងលេត)