أنظر جيدًا (كارثة الحي الشعبي)

الفصل الخامس والستون

ينفع اقول ان الفصل ده لو وصل لـ ١٠٠٠ فوت هنزلكم فصل زيادة الاسبوع الجاي 🌚😂❤️❤️❤️

_______________

أنظر جيدًا.
كارثة الحي الشعبي.
فاطمة محمد.
الفصل الخامس والستون:

عاد "عابد" إلى المنزل واطبق الباب من خلفه...مما جعل دلال تدري بعودته..فنادت عليه بصوت جهوري تحثه على التقدم إلى الصالون..
-تعالى يا عابد...

وعلى مضض فعلها وغير مساره فبدلًا أن يصعد إلى حجرته ويلجأ إليها وينعزل عن الجميع..ولج حجرة الصالون..فوجد "دلال" تجلس على الأريكة...وبجوارها خليل..وبالاريكة الاخرى يجلس كلا من أشرف..ونضال..
وبمنتصف الصالون قفص حديدي بداخله "النسناس"...

قطب حاجبيه وصاح بدهشة واضحة:
-ايه ده؟؟؟!

ردت عليه والدته بسخرية:
-ده أخوك جابر بعد ما اتسخط قرد..تعالى سلم عليه..

وقبل أن يتحدث أو يفعل أي شيء سارع نضال بالحديث من بين ضحكاته الذي لم يستطع كبحها:
-روح هاتله بقى شوية سوداني..وموز بدل ما انت داخل بأيدك فاضية كدة.

زاد انعقاد حاجب "عابد" وتحدث بذات الدهشة:
-انتوا بتهرجوا صح؟؟ ايه الهبل اللي بتقولوه ده..وبتاع مين القرد ده؟؟

كررت دلال ذات الكلمات تؤكد له:
-ما قولتلك جابر..اصلي دعتله دعوة جابت اجله وسخطته...

قالت الأخيرة وهي تلوي شفتيها وتتعمد ألقائها بتلميح لما فعله سلطان...فتنهد خليل وطالع كلا من نضال وأشرف الذي أدرك مؤخرًا ما حدث وسبب غضبها ومغادرتها اليوم من المطعم...

انكمش وجه عابد ضيقًا وقال بزهق وملل:
-لا أنا مش فايق لهزاركم بصراحة..انا طالع اوضتي..تصبحوا على خير...

وقبل أن يتحرك صرخت دلال عليه غاضبة منه ومما يفعله بذاته:
-هو ايه اللي طالع اوضتك..هو انت عايش في فندق..تيجي..تاكل وتنام ومنشوفش خلقتك مش فيه بني ادمين عايشين معاك وليهم حق عليك...

عقب نضال بمرح:
-لا وأنتِ بتأكلينا أوي..ده احنا بقالنا ساعة بنحاول نقنع فيكي تعملنا اي حاجة نأكلها..وفي الاخر قمتي عملتلنا سندوتشات جبنه..

اكدت احتجاجها عن طهي اي طعام لهم قائلة:
-إذا كان عجبكم...انا من النهاردة مش هطبخ ولا هتعب نفسي..كل واحد فيكم لسانه طول كدة...فـ اتلحلحوا انتوا وابوكم بقى وصرفوا نفسكم وطولوا ايدكم زي لسانكم...