صباح الخير، بخصوص فصل امبارح وهدية وعد واللي البعض شافها اوفر، فـ هي تتناسب مع شخصيتها، يعني واحدة جابتله اول مرة نسناس !!
متوقعين تجيب ايه؟؟
وفعلا كتير منكم لما نزلت الاقتباس قال إن الهدية تعبان وخمنتوا صح.
دي شخصية وعد وفي كتير كدة في الواقع، يعني مثلا ممكن نقابل شخص ومنحبوش ونبقى شايفين أنه اوفر ومحدش بيعمل اللي هو بيعمله ونبقى حاسين أننا مش طايقينه وننفر منه..
وطبعا زي ما في اللي شايفينها اوفر وهديتها سخيفة، فيه اللي ضحكتهم، يعني شخصيتها مثيرة للجدل وانتوا اتقسمتوا اتنين ففي اللي بيحبها وفي اللي لا من أول الرواية..
كذلك مروان واللي بعضكم شايف تصرفاته مع جابر مستفزة واوفر، وهو فعلا كدة ودي شخصيته حتى مع رحمة و ولاد عمه، ما بالكم بقى مع جابر اللي هو مش طايقه من أول الرواية أصلا وشايف بنته كتير عليه، هيبقى عامل معاه إزاي !!!
يعني لو فكرنا فيها وراجعنا تصرفات كل شخصية منهم هنعرف أن اللي هما بيعملوه متوقع منهم..وسواء حبتوهم أو لا، شايفنهم اوفر ولا لا، فالاختلاف في الرأي لا يفسد للود قضية، ودي في الأول وفي الاخر رواية هدفي منها تستمتعوا بيها ويبقى ليها مغزى وبتناقش مواضيع كتير، وممكن تلاقوا فيها مشاهد كوميدي لا تمت للواقع بصلة، هدفها بس إسعادكم، وأصلا قربتوا تخلصوا منهم خلاص.😂❤️
دمتم سالمين.
