نوايا القلوب..

٦

يسعد صباح الغالين

...

بهوسة الناس شارعنا انگلب
واني مااعرف شصار بيه اريد بس افوت البيت هوسه وماافهم شي كلها تحجي وتبجي وتصيح ونسوان تلطم

وشباب مسلحة بالباب يكولون ماننطيه السيد

فرحت بگلبي ماينطوه بلكي عدل يطلع

رجعو يگولون سبع والله ماانطه روحه قاومهم وصوب منهم وانكتل طبو عليه النص بيته وماسلم وهسه يكولون يردون يستلمون جثته يوثقونه  بتحاليل وصور ومااعرف شنو يسوون يمهم بمستشفياتهم

صحت

..هو مات لو عدل أحد يگلي يهالناس اخوي عدل لو مات

صاحت جاراتنا وهنه مشبگات أديه بأديهن

..مات يمه مات يعينجن الله
شگالت ارواحجن احنا ومفجوعين عليه مايشتاهل السيد عفيه گاع وكحه تضمه

سوولي مجال كوه فتت بيتنا هوسه كله مااشوف شي ولا اعرف بس رجلينا مشت ع الصوت جان بالحديقة الخلفية

الي ياما گعدنا بيها هو بالذات مسامرهم وي ابوي شغلهم نقاشاتهم كلها هنا تصير بعد صلاة الفجر گبل طلعتهم الا هنا يگعدون بالصيف يحجون الي بخاطرهم

لكيت راسه بحضن امي ومغطه بجرجف بس الگاع بارده والجو ثلج شلون هيج البروده تأذيه ودي اشيله لفراشه

بناته وخواتي كلهن داير ميدوره فاقدات ورجلينه بحضن ابو تمار چان يشيل بروحه ويرگعها محد يگدر يلزمه مفرفح ذبيت روحي فوگهن ارد اوخر عنه الجرجف اشوفه امي ماتخليني لازمته بكل قوة

تحاجيه بعبره

..مودع بالله يمه المن عفت هالبنات ابنك عوده ناعم مو حمل هذا الثگل يتلكاك سيد الشهداء يابعد امك يمه

صوت رياجيل بره وزهراء اتخبلت تصيح ماننطيه ماياخذونه والله اكتله اليجي بصوبه

ارد افهم ياهو الياخذه

اخواني وين باسم حازم ماكو احد

شفت حازم بنص الزلم وهم داير مايدوره

واگفين بعاد عنا يقنعوه يقنعنا نوخر يردون يشيلوه يغسلوه ويحضروه للدفن

گام ابو تمار

گال

..ماانطي ابوي والله ماانطيه وصيته عمي احمد يغسله يجي عمي يلا

هوسة وماندري شوكت صفت والساعات مرت باسم طب گلب البيت گلاب احنا ماسوينا مثله رغم كلشي وساعات الفقد الي اطير لب العقل چنا محافظين على حشمتنا وحجابنا وماعدنا غير النحيب على نعي امي وسهام وجاراتنا خاص ام غايب مثل الفقدت ابنها من صدگ

بس باسم چان عقله طاير يگله اجيت ابشرك واگلك الهدف نجح مثل كل مره وهالمره ماظل برتلهم صورتلك العملية وفرحان اجي الگاك مكتول