نوايا القلوب..

٢٩

يسعد اوقاتكم بكل خير وعيد سعيد ومبارك عليكم ينعاد بالصحة والسلامة عليكم وعلى احبابكم

ولو متأخره بس مكدرت اعايدكم بدون بارت ومكدرت انزل الا هسه تعرفون وضعي بالاعياد شنو

الشهر الفضيل خلص ويارب خلصنا من ذنوبنا وثبت النا والكم اجر

راح ارجع وياكم بالتنزيل بين يوم ويوم أن شاءالله
وإذا فرغت أنزل يومي تعويض الكم عن الايام الفاتت

....

حِينّ أشتاقَ إليك ! تتغِير مَلامِحِي، وَيَتعَبُ قَلبي ثُم أقْسُواَ عَلى الجَمِيع دُون ذنب لهُم.

...

هي..

بين كل الموجودين وعددهم أكثر اوقاتها تشعر بالوحدة رغم قربهن الها واندماجها البسيط وياهن لكن تبقى تشوف نفسها غريبة بمشاعر اغرب!!

هالفترة صارت كلش تحب والدها لكن تحس بخوفه يأذيها ويزيد همومها ويصعب عليها المرحلة الي تطلب شجاعة منها وبخوفه جاي تفقدها رغم مقاومتها القوية تحس بنفسها تضعف بضعفه وخوفه المبالغ بيه

عماتها والبنات تشوف حياتهن حلوه رغم كل المر عليهن متقبلات واقعهن وهذا احلى مابيهن مرحات هن رغم الحزن ماخذ منهن والدنيا متعبتهن بين فقد الموت وفقد بالحياة بس هنه صبورات ووجوهن مبتشره
  تحب تكون مثلهن وبينهن بس احساسها مدمرها تحس نفسها مكبلة بسلاسل من الحديد محاولتها للتحرر من هالسلاسل متعبة ومرهقة
وبقائها حبيستهن صعب جداً 

هذه السلاسل كانت من اقرب الناس الها من امها الي المفروض اليد الي تنتشلها وتاخذها البر الأمان

مستغلة مشاعرها واحساسها بالمسؤولية لازمتها من أيدها التوجعها وتعرف نقطة ضعفها شنو

نقطة ضعفها خواتها الي عازمة على بيعهن وجاي تساومها بيهن
لا اهلهن بيهم خير الهن ولا الناس الي تشوف بيهم طيب ممكن يتقبلوهن ابوها عمها عماتها ولا حتى ذاك الي تسميه أمان بأي رقيقة ممكن يگدر يساعدها ويمنع هالبيعة

من اول رجعتها بين أهلها معاناتها كانت صعوبة الاندماج وي غيره وصعوبة تقبل مشاعرها اتجاهه
قنعت نفسها فترة بكرهه جرحته اتجاوزت عليه رادت منه ردة فعل تعزز كراهيتها لكن اسلوبه وياها زاد تعلقها بيه صارت تشوفه ملاكها الحارس وامانها المفقود من الصغر

بنفس الوقت تحس نفسها هي أقل من استحقاقه راح تظلمه بمشاعرها وباطباعها الي هي مو متقبلتها

حاولت تخفي هالمشاعر ومحاولاتها هذه أذتها ورجعتها للظلام

اتجهت الطريق اسهل!

شافت نفسها بأبوها وان المعاناة وحدة وتجمعهم اقتنعت طريقه للهروب من الحالة الي يشعر بيها اسهل واريح اله والها