نوايا القلوب..

٢٤

يسعد صباحكم حبايب ..
...

امانة الخطار الهسه عندي لهذا اكتب كل شويه وكت فراغي وجاي اتأخر عليكم ♥️

....

ابو تمار..

دائما ميزان البشر عندي الموقف .

طلعنا وأنه مامستوعب علي بالذات يكون هو الظل چنت اشك بأحمد أو اولاد علاء ممكن لأن حتى ابوهم ورغم ضعف موقفه ماچان يرضيه الي يسووه 

لكن علي العقل المدبر العادل وذراعه اليمين نهائيا مستبعد من دائرة الشك الي مخليها عليهم

وصلنا للإمام زرنا وجدد عهده راح يبقى مثل ماهو محافظ على وصية والدي

يذكرني شلون چان دائما چان يوصيهم بيه أمانتكم ابو تمار صيروله مثل الظل لاتتخلون عنه سندوه واوگفوله وگفة اخ چانو گد الوصية رغم البينا وفو وعدهم

كل همي چان يحچيلي شلون گدرو يبقون على الموقف
رغم كل الأحداث
رجع بذاكرته السفر ابوهم وتخليه عنهم
چان يحچي بحسرة وتعابير وجهه تشرح معاناته

..ابو تمار احنا مو صغار وعينا على كلشي
دموع امنا وبچيها مستقبلها الي اتحطم هي وخالاتي خسرن وظائفهن واتبهذلن وياهم
تخلي عمامنا عنا سنين طويله كبرنا ولا يوم واحد منهم ذكرنا بشي

خالي چان أكثر من اب حتى الي يحچي يمنا على ابونا چان يخاف على زعلنا لأن الكلام فعلا يأذينا مو خوف عليه بس ننقهر

چان يسكتهم لو يطلعنا ويجنبنا الاحراج مايوم اتعاجز منا لو شگد ماتعبان يحچي ويانا يشوف شمحتاجين بيوم احمد چان راجع من الدوام متكأب بسبب الطلاب وضغوطهم عليه لأن قضية عادل انت تعرفها مايحتاج نحجي بيها

بذاك الوقت المعارض اصلا للحكومة ينبذ من المجتمع ويصير كأنما عار لو هو فراري مو انوب قضية سودة مثل هذه

چان ناوي يبطل واني مثله
گعدة وحدة وي خالي قلبت الموازين كلها
بأسلوبه عزز ثقتنا بنفسنا وظل يومية يخصص وقت النا الحد ماكبرنا احنا مدللين وعايشين بخيره حتى خالتي حوراء رغم التزامها وصعب عليها وجودنا وهي ملتزمة والبنات مايوم حسينا ثگل وجهه علينا بالعكس

وچنا احنا هم نحترم حدودنا يعني باختصار عائلة وحدة من وعينا الحد شبابنا شلون ممكن نتغير الهذا الحد الي توصل بي للعداوة الفعلية ننسى كلشي ونصير وياهم احنا لو ماضغوطهم علينا وتهديدهم النا بحياة امهاتنا وحياتك جان اخذناهن وابتعدنا عن الطرفين

چان ممكن تمشي الأمور صح لو ماعملة باسم ودگته الي سواه احنا دفعنا الثمن بيه والاكثر اولاد عمامي الصغار

گلت

..علي لهنا وحدك من توصل الباسم وتريد تلومه نتخارب صدگ
الي سواه عين الصح لو مامسويه هو أنه أسويه لاتنسى  احلى سنين عمره وشبابه كله راح وهم مايسوون عارات اخذو جزاهم