نوايا القلوب..

١٣

يسعد مساكم الغوالي ...

....

شبا..

صعد يركض خفنا كلنا ونتسائل شكوو لحظات ونزل بيده علاج گال بعصبية صاح

.. فتحلي الباب بسرعه نسيت انطيه علاجه من ينهار الطبيب محسب حسابه وكاتبله علاج وأنه النسيت مدري شجاني المفروض من اول لحظات انطيه هالعلاج

فتحتله الباب عمتي اسيا وبقت يم الباب تخاف تطلع لاتگدر تقفله عليهم خاف بعده أعصابه تعبانه ولا نگدر نخليه مفتوح عمي من ينهار هيج مانعرف شنو يسوي بساعتها

هو بس ابو تمار يسيطر عليه ويظل يومين مكتئب وحالته حاله لأن بعد مايهدأ عمي تبين على أكتافه وذراعه علامات وندب من لزمة ابو تمار القوية
وحتى مرات اديه تظل تأذيه لو تنخلع يظل يلوج منها وأبو تمار يعالجه
‏ومن يعالجه وبكل مره هاي شويه وتنزل الدمعة من عيونه لأن يشوفه متعذب لهذا دائما يگله اهدأ لاتخليني اذيك
‏مستحيل يسيطر عليه إذا مو بالقوة واليوم لو مامدخل چان كسر ايد مؤمل لو خانكه هذا غير وجهه الكله كدمات من الضرب

ابو تمار شرب عمي علاجه هو بس تخلص النوبات يتعب ويهدأ بس هالمره دموعه ابد ماوگفت چان يبجي واكتافه تهتز
حضنه ابو تمار باس اديه وراسه وظل يحجي وياه يحاول يقنعه أن هي مابيها شي محد اذاها گله هي خافت عليك رادتك تكون اقوى من هيج

هدأت الأوضاع وصار المغرب امهاتي اتوضن وراحن يصلن اني هم رحت وراهن لأن بس أعطل صلاتي بعد مااصليها اتعاجز منها إذا مو بوكتها اغلس واظل كل شويه وحده مذكرتني لو مرزلتني وماسحة الگاع بيه

صليت وخلصت بسرعة وهنه ظلن يدعن ويسبحن بتسبيحات السيدة الزهراء سلام الله عليها

وگامن البنات يحضرن عشه اني شفت ابو تمار من كمل صلاة هو ومؤمل صعدو

صعدت وراهم لگيتها گاعده وهم يمها وياهم عمه اسيل

ابو تمار اعصاب صاير تگله انطيني تليفوني
گلها

..عوفج من التليفون ماادري وينه... انتِ شبيج شصارلج من شويه اول مره هيج يصيرلج احچيلي

ردت بتعب

..لا بتصير معي بس بفترات طويله

..ليش هيج يصير وياج مراجعه طبيب

..لا هي نوبة من نوبات الجنون

استغفر الله وفرك وجهه بقوة وهو يتنفس وحاجاها

..مو مجنونة انتِ انسي هالسالفة ومو هيج نوبات الجنون

..انت ليه بتكذب على حالك ما هيدا عرق فينا بيورث الكل ممكن بيوم انت بتجن عادي

دار وجهه بتعب  ماطايق روحه گال ابقن يمها

وهو بالباب صاحت