نوايا القلوب..

..

جمعة مباركة حبايبي ..

القصة البارحة طبعا ختمتها بظروف قاهرة وي ماقررت اكتب واعدل النهاية اجو علينا ناس الابو علي عدهم مشكلة وبقو اكثر من ساعتين وهم طلعو واجو الطرف الثاني وكذلك
اتخيلوا اكتب واني اجهز چاي وگهوة ومي وخبصه

زين وفهمتوها على كمية الأخطاء البيها بس حاولت اذكر كل التفاصيل المهمة الحمدلله

الي فرحني بكل هذا ان القصة صارت سبب برجوع ميس وعمار يمكن ع كولتها دعائكم او نصائحكم
وحتى الي نصحوها مترجع كان بدافع الخوف عليها من استغلالها وطعنها مره ثانية ممكن يواصل زوجته او ام ابن اخوه وشرطهم كان الانفصال
ابراهيم نهى كل هالشكوك من شجعه على الانفصال لأن هي فكرته موجودة من البداية ابن اخوه حاليا عمره ١٦ سنة ولد شاب وجده يخاف عليه بسبب مرضه ويحبه المحبة والده مو مثل عمار منبوذ من صغره يعني ماينخاف عليها بعد لهذا انفصل بهذا الوقت

كان للقصة اثر ايجابي
والحمدلله هذا بفضل ان متابعيني اكثرهم واعين
هوايه يگلولي مشاهدات قليلة وتفاعل قليل بالنسبة للواتباد وعن نفسي اكول هذا القدر يكفيني اني مو كاتبة هاوية احب اعكس صورة حلوه عن مجتمعنا
اكو عوائل متمسكة بعاداتهم الحلوة وتقاليدهم وملتزمين بدينهم وهوايه بس محد مسلط عليهم الضوء

دائما تجيني قصص اذا انكتبت وبطريقتي تتغلب على كل قصة يمكن كاتبتها بس نموذجها سيئ
برأيي النموذج السيئ مايستحق البطولة مهما كان ولا يستحق نقدمه كنموذج

بداية ما ماس حجتلي عنهم ليش الكذب اتخوفت انقلها بطبعي مااحب السياسة الا اضطر اخوضها وگدرت اوصل الفكرة بشكل عام بدون مااثير جدل واذكر تفاصيل ماكو داعي الها وعدم ذكرها ماراح يأثر بمضمونها
قررت اسأل ع بيت السيد خاص هم بمنطقة مو بعيده عنا من المناطق الي مجاوراتنا ورغم انتقلو منهم لكن كل الي اعرفه واسأل عن السيد الله يرحمه عائلة اثق بيها كلش گلولي سمعته مسك وعنبر وهيل
بهذا الوصف وصفوه وان المنطقة الهسه ماناسيه والهسه متواصلين وي اهل بيته رجعت خبر الماس ووافقت اكتب وردت اتعرف ع البنات سوتلنا مجموعة بالبداية
قمة بالاخلاق ارواحهن مرحة اتشجعت اكتبها اكثر
كنت ناويه بالزايد بثلاث اشهر اختمها بس سبحان الله كالعادة من اكتب الظروف كلها تعكس وياي ورغم اضطريت اترك فتره كل سؤالهن كان عني وتركني على راحتي
النهاية الكانت مرسومة ابد مو يم هذه النهاية وسبحان الله التأجيل كان سبب بنهاية اكثر تكامل وجمال

البارت الاخير اعدله وبعدها القصة كلها احاول اعدلها الصراحة اخطأ هواي واتعاجز من تصحيحها
وانشرها بوقتها خوفا من حذف البارت متكرر وياي هالموضوع

بالنسبة العمار
من اول ماحجتلي ميس گلت عمار خوش عمار وهذا رأيي متمسكة بي حتى من كانت رافضة ومتخوفه من الرجعه لأن انسان مثله مخذول ومنهك ووحيد ومحافظ على روحه الطيبة واخلاقه ومحتوي بناته رغم كلشي من النوادر
نصحتها ان تأسسله عائلة متحابه وتحتويه وتصير هي اهله وراح ارجع واگلها طبقي وصية ام ابراهيم هههههه
ناصحتها تمليله بيته اولاد وبنات وتسويهم عشيرة اله بعيد عن اهله ومعارفه وتغنيه عن حاجتهم

وابراهيم وعابد الهسه متمسكين ياخذون عمار وخلفته ملحق الهم عابد يگله خطيه اهلي معوزين خلفه وعدد 😂

ترى الي مثل عمار هواي اكو اهل بلاء يتسلط ع الابناء مثل مااكو العكس بس قهر الرجال كلش صعب مو كل شخص يتحمله وظلم الأهل من اقسى انواع القهر

بصراحه اني حبيت احمد ووگفته وصداقته وهذا معنى الصداقة الحقيقي كم سنة صار استشهد السيد وماتركهم بالعكس زادت روابطهم اكثر

ان شاءالله بزواج مؤمل النا عودة ابارت مكمل للقصة

وطبعا الشكر كل الشكر مني ومن البنات للكاتبة وئام
وبنات مجموعتها
البنات يعرفون شكد هنه وگفن وياهم وكان الهن الأثر الايجابي بالتفكير برجعتهم وكلش كافي دعائهم ورسائلهم
هنه يعرفن اثرهن زين كل الشكر الكم حبايبي

...

وهسه ارشحلكم قصتين حلوات كلش

الأولى قصة للكاتبة ياسه

قلعة الشيخ مهران

والثانية قصة ريام اذا مااكون غلطانه بالأسم اول مره اقرالها كم بارت ومااعرف اذا قصتها الأولى او لا لكن هي متكامله وروعة من ناحية السرد واختيار الموضوع
كلش احييها وراح اكمل قراءة وياهم
محلة نجيب باشا كلش انصحكم بيها

وانتم هم رشحولي قصص وقت الفراغ اقراهم

..