نوايا القلوب..

٣٧

يسعد مساكم حبايب..

....

ميس..

فتره مرت وشبا مامسموح يطلعوها اساسا ماتنام ولا تهدأ الا ع المسكنات وعلاجها مستمر لحد الآن عمليتين الرجليها سووها بلاتين احتاجت للفخذ

نروح نزورها نشبع قهر وبچي ونرجع مابيدنا شي عليها يمها نكابر ونضحك ونقويها ومن نطلع ننهار
لحد الآن مشايفه اثار الجروح بوجهه من يم حاجبها وعين وحده انسحبت من أثر الخياط والثانية طبيعية خلل واضح مبين بشكلها عين مسحوبة وعين لا

الطبيبة فهمت الوالي ممكن الثانية يسوولها سحب تجميلي وي رتوش للمصابة تتجمل عينها وميبين فرق اذا طبيبها شاطر

شفتها الأعلى ملمومه عبالك شفة ارنبية ومجمليها هي كشكل مو مثل عينها مأثره بس واضح فرق عن شفتها الجوه الي يشوفها يگول مسويه فلر بس للشفه الفوگ وهم اثر الخيط واضح والجوه نشاز انعم

غير خدها وجانب من راسها الخياط صاير من بداية الشعر من الگذلة للزلف واضح وميطلع بي بعد شعر وأثناء العملية مزينين هالجزئ
لو شافت روحها مراح تتحمل وخايفين من هاللحظة

الوالي يكول الأهم صحتها هسه رجليها تتحسن وظهرها بعد يسووله عملية الفقرات

والباقي كله بسيط عينها اسويله الگالته الطبيبة
وخشمها مكسور هم يتعدل
والشفة حسب كلام الطبيب ماكو ابسط منهن هي وآثار الخياط بالوجه بالنسبة الدكتور التجميل بس الاهم هسه تكمل عملياتها وتگدر تمشي لحد الآن ع كرسي متحرك هي أو بالسدية ينقلوها

امي وياها وزهراء يتناوبن ويساعدنهن عمتي اسيل وآسيا

رغم عمتي اسيل اتمرضت ابد ماصحت ضغطها مامستقر وحالها كله اختلف شكلها اتغير
بس ماتركتها ابد مرات ماتقبل حتى تبدل وي غيرها تريد تبقى يمها ومن تشوفها تتعذب مرضها يزيد
الوالي گوه يدزها للبيت النا ترتاح

هو هم سودة عليه ولا ارتاح ابد يجي للبيت ميتركوه يرتاح
يدزون عليه ناس يروح للمستشفى واكف وگفه ويركض من طابق الطابق بالاجراءات والفحوصات ومن يشوف شلون تتأذه يموت قهر ويشد على ام عادل وامل أكثر يرفض اي تنازل يردوه

آخرها گام يطرد شكو واحد جاي منهم مايستقبل اي شخص

لزموهن بفضل عابد انطى تفاصيل هوايه عن امجد الابو تمار وعمي لأن باقي يراقبه فتره ويعرفه وين يروح ووي منو يلتقي وطلع
البيت الي اخذهن اله من ضمن البيوت الي چان يتردد عليهن هو وجماعته بأوقات معينه يتونسون بيها ع أساس

والظاهر هو بيت من بيوت زوجات عادل الي سافرن وياه وعنده مفاتيحه يعني ملكيته العمه وهو الي مخوله بيهن
وهذا الي اكدلهم أن امجد باقي ع تواصل وي عادل ومسنود منه أكثر من ولده الي صار خلاف بينهم بعد ما اخذو عمتي واتواصلو ويانا