نوايا القلوب..

٣

يسعد مساء الغالين ..

عندي طلعه واخاف اتأخر عليكم بالتنزيل قررت أنزل البارت قبل لااطلع

حبايبي اكو متابعه مشكورة ذكرتلي أن اكو كاتبه أو حساب بأسم ورد جوري منزله القصة بدون تكتب منقول عني وهي كل ظنها أن القصة الها
حبيباتي الناقلات تجنب للأحراج واشتباه القراء اكيد انتو ميرضيكم تسرقون تعب غيركم لكن ممنتبهين الهالموضوع ياريت تنوهون أن القصة منقولة

......

لكل حريقٍ مطفئ فللنار الماء، وللسمِ الدواء، وللحزن الصبر، وللعشق الفرقةُ، ونار الحقد لا تخبو أبداً

...

اتخبلت من طلبهم شلون مقتنعين هاشم عنده حوراء روحه من الدنيا نفرح كلنا من نشوفه طول ماهو بالبيت البسمة ماتفارگه وهو يمدح بيها ويثني بمواقفها وتستاهل منه يخلص الها ويحبها حوراء من الي تنوصف بالكامل الي مكملة والكمال لله مايوم اشتكت من انشغاله بينا وبالجار والصديق مايوم كلفته چانت نعم السند هي تعينه أكثر من الكل

احنا من نروح البيت اهلي وهي ماموجودة نحس نقص چبير ام وجه اليضحك وحچاية الدافية

اجيبلها علة على گلبها وگلب اخوي لا والله لو اعرف موتي وحياتي بهذا الموضوع مايصير

حاجيته بحرگه وأنه أملخ بروحي

..هذا الطلع بيدك هذا حلك الطلايب اختك اهلي ناقصين فوگ دگة اخوك الزينة تهجم بيتهم بأمل

..شو أنتِ ماتستحين شبيها امل الظاهر انتن الي خالات بالجن وياها ومعادياتها فوگ قهرها شكو بيها الله أمكنه وهو عاقل يگدر يصرف ع الاثنين ويعيشهن بنعيم

..انت مقتنع بحجيك شايف ام زهراء بعينه شلون هو يشوف الدنيا بيها مكفيته وغانيته انسو هالسالفة يرحم اهلكم ترى ملينا وتعبنا هو من چان عزابي مامقتنع ويشوف امل مثلها مثلنا اخت مو اكثر

..الرجال مايكتفي بمره اذا الله غاني شذه ومتمكن گلبه وعقله يوسع أكثر وهي مامشتريته حتى هيج يخاف منها وانتن ترعشن خوف من زعلها شدعوة هيج هسه تطلع على حجاية امي صدگ ساحرتكم

ضحكت

 
..انت تحجي عن الذكور المفجوعين وعيونهم مايمليها الا التراب مايكتفون بحلالهم ومستعدين يزنون مثل قدوتكم المكيفين ابطولته
البارحه اسمعك انت واخوك تتسامرون بفخر شلون عادل سبع كسر عين الضابط وماسلم نفسه وطلع منها مثل الشعرة من العجين رغم انتم واحنا دفعنا الثمن بس شحجي وشگول

..تتصنتين علينا انتِ؟ مو هيج جان حجينا سمعتي
جزء منه

..الحمدلله ماسمعته كله لأن لعبت نفسي وطحتو كلش من عيني السواه اخوكم مو فخر وماعلينا سالفة امل انسوها