نوايا القلوب..

١٧

يسعد اوقاتكم ...

.....

باسم

فتحلي الباب السجان وگال عندك زيارة مأشرلي بأيده يذكرني اذا اريد زيادة وقت أزيد فلوسة

ابو تمار أحسه هلك الفتره الراحت بيني وبين اهله وشغله ودوامه تعب كتله لاتجي بكل إجازة ارتاح التليفون كافي بينا لأن بالبداية لحيت ع جيتهم ومن عرفت وضعه عذرته

ابتسمت وطلعت فلوس للحارس وأنه اريد اتأكد مامعقولة امي اجت اردود

.. نفسه موو

.. ليش منو غيره يزورك من اهلك

.. الحجية خو مو وياه

.. لا

.. الحمدلله

طلعت اتمشى براحه مدري ليش احس بجيته چن شايف هاشم مو ابنه الهسه ماارد اصدگ مااشوفه بعد واتخيل هو بالبيت موجود وقريب الي اقرب ناسي كلهم ومراعيني وكل خير يجيني منه احس هو موصي بيه

  اخر ثمن سنين بالسجن غيرن مني هواي خاص بعد النقلة الاخيرة الي كانت بواسطة من اصدقاء اخوي مكانهم هنا نظيف وهم مهتمين بنفسهم اكلهم بيدهم يطبخوه وتنظيف المكان هم المسؤولين عنه بدون مشاكل بدون محاولات للاعتداء والقتل اتذكر سنيني الاولى شلون خلصتها ينقبض گلبي
بس اليوم بالذات روحي تحن ورايده شوفتهم  واريد اي واحد يطمني  متحلم بيها البارحه وحسيتها تعبانه وبشدة وتريد معونه مني وأنه مابيه أعين روحي

شتت أفكاري
وضحكت الضحكته گبل لااوصل فاتح احضانه الي
بادلته

وگلت

.. مامليت من زيارتي

.. شلون امل انه لو بيدي يومية اجيك

.. احجيلي عنها شلونها

ومثل عادته من يستفزني رغم فاهم قصدي رد عليه ابرود

.. امك زينه وتسلم

..عود يحرجني الكلب امي من ايام يمي وعساها دومها بخير بس منين تشوف الراحه وانه مدمر صحتها
ولك لاتشلع گلبي  گلي هي شلونها

.. البارحه جابت رابع ولد

.. الله يشلع گلبك

..هو مشلوع اخوك وبنته مامقصرين
سيد جهز روحك يومين وتطلع

..مااصدگ الا لمن اطلع صدگ ..وشجهز روحي شعندي هنه هدوم بلون واحد كلهن دخل اطلع الا اطلع بعمري ولا غرض أخذ

..وداعتك تطلع البارحه شفت الشيخ گالب الدنيا ع الوزارة كلها من الوزير للقاضي معرقلين طلعتك بدون اي عذر قانوني وخوش فارها عليهم

ترى صار اشهر من أتنازل عن قضيتك عادل

..عادل العاطل يتنازل؟ وبارادته شلون يريد يموت لو شغلك هذا
وليش هسه يلا گلت