نوايا القلوب..

٢٣

يسعد مساكم حبايبي

البارت أكثر من ٥٠٠٠ كلمة

....

ابو تمار..

بعد مافشلت الخطة عرفت صاير هجوم ع جماعتنا واكو شهداء ومصابين وبعد مامتأكد منو هم

تركت كل اشغالي مالي خلگ احس بروحي مخنوگ خاص من اتصلوا بيه جماعتي يأكدولي استشهاد اثنين بصد هجوم غربي سامراء

رغم هالمناطق حررناها واتلگونا أهلها محتفلين خاص منطقة الحويش أحتفالاتهم تفرح من طبيناها بوكتها حسينا بتعبنا وسهرنا وجوعنا والدم الي انطيناه اله قيمة وفدوه للبلد والفرحة هاي الناس خاص الاطفال وبرائتهم تلوگلهم الفرحة

ورجعت المدن شويه شويه تستقر

بس هم تصير تعرضات مرات

واحد من الشهداء اليوم كان برفقتنا وقت التحرير ومن الي مشاركين ابوي بالجهاد ضد المحتل ماچنت اعرفه الا من دخلناها بقيادة القائد حسين عطية الساعدي

چان مو قائد من جماعة الأوامر والتصوير لا متعالي ولا يدور مظاهر
الي يشوفه يحسه ابسط جندي بينا بوكت الاستراحة
يگعد ويقسم خبزته ويانه مستعد ياكل طماطة نية ورغيف من الخبز وينطي حصته من الأرزاق الغيره
چانت توصلنا الأرزاق بصعوبة وقليلة

بطبيعة الجندي تلقائيا يتأثر بقيادته من يشوفوه مشاركهم كلشي يحسون بقيمتهم ويصير دافع الهم معنوي وروحي

من نشوفه يتعمد يأخر بينا خاص الشباب احنا ويتقدم هو كل المعارك
نحس بقيادته الفعلية لهذا معارك تحرير الحويش بالذات قدمت بيها اقوى ماعندي وبروح عالية بوكتها هواي عرفوني اني ابن الشهيد السيد هاشم لأن أغلب جماعتي يصيحوني بابن القائد هاللقب يثير فضول البقية للسؤال

بوكتها عالجنا هوايه ثكنات للعدو

بصواريخ الأر بي جي نسميها قذائف

الي استشهد اليوم كان ويانا وي كل قذيفة أطلقها على هدف منهم وتنجح

يگلي

.. لاعابت ايدك ولاشفت الهم والعوز
شمرة ابوك بيك ياما وگفت ذراعة ارتال للمحتل 

من يومها وهو رجال شيبة واكبر حتى من والدي الله يرحمهم ماتركني ابد واتعمد يدخل بنفسه من جديد ويرجعوني للمقر نشرف وندرب وما نطلع الا بالمهمات الي تحتاج تدخل خاص منا

وفعلا صار هالشي ورجعت المكاني طول الوقت تدريب  واي مهمة يوجهولنا بيها نداء ننطلق

وجود هواي منهم كان داعم معنوي الي

وخاص عمي احمد وجودة بينا اكبر دعم بالنسبة الي و بهالفترة اترفع بقيادة لواء كان مشارك بتحرير الجزيرة