نوايا القلوب..

٥٦

يسعد اوقاتكم حبايب

طبعا المفروض اني خاتمة هسه بظروف تختلف اكو مستجدات هي الأخرتني هذا بارت والاخير ان شاءالله الخميس اليجي لأن الاحداث التجي انقلها بوقت الحدث

....

شبا..

طلعت ميس بعد ماساعدتني وونستني ضحكنا وحجينا مواضيع مثلنا مثل اي خوات من يلتقن ورغم اني يومية تقريبا يمهم او هم يمي بس هي اقل وحده اشوفها تجي من الدوام تنام ترتاح شويه تنشغل ابناتها وبالليل هم من وكت تنام مااعرف تتظاهر بالنوم

ردتها تبقى يمي اكثر اساس يجي عابد وماقبلت تبقى الوقت جيته انتظرت امي تجي تأخرت وعابد مااجه
اتصلت بالبنات مثل عادتي من افرغ اتصل بيهن وقت فراغهن ولا وحده ردت ومن لحيت جاوبتني اسراء
صوتها تعبان سألتها

..شبي صوتج صاير شي گالت

.. جهالي فلاونزة ومتعبيني وحسن اليوم خفر

وصيتها عليهم واذا تحتاج احد يمها تجي الاهلي او تخابر امي تروحلها تبات يمها حسيتها كلش تعبانه كالت ان شاءالله لاتهتمين ادبر نفسي 

اتصلت بعابد تلث مرات ارد اكله راح اطلع الاهلي تأخر
ومليت وحدي  گلبي وجعني لأن مايرد مو عادته ابد مايتأخر عليه

هو گايلي شوكت متردين ترحين الأهلج روحي

بدلت ملابسي واخذت عباتي والنقاب وطلعت مرات البس كمامة وحجابي هم الفه بطريقة حلوه ميبين مني شي اذا مشوار قريب الاهلي بس هسه مااگدر اطلع هيج امكيجه وشكلي بالكمامة يصير يجذب اكثر
بالدوام بالبداية عانيت من لبس النقاب بعدها اتعودو عليه واني هم مااهتميت النظرتهم من الاساس متعوده
قفلت البوب وطلعت

دگيت الباب هوايه ماكو احد باب عمي بيت عمي باسم مردودة فتت منها ومن حوشهم فتت الحوشنا من الباب الداخلي

اريد اسلم بصوت عالي مثل عادتي اجاني صوت امي

..لحد يگل الزهراء تتخبل حلوها وياها بأي عذر علما يطلع من العمليات ع الأقل

فتت مصدومة عماتي وبيبي وميس ومهجة كلهن يبجن وامي تحجي وتمسح بدموعها ومرت عمي تدعي وتصير عليهن الجهال هوسه ويبجون ومحد مهتم الهم كلي غريب هنا احس گلبي مدري شصارله

..اسم الله شصاير شبيه ابراهيم غير اليوم نزوله هو  واصلهم هسه مو  زهراء ماترد عليه كلت وصلهم والتهت بيه شنو شصاير

اسأل ومخليه ايدي ع گلبي ودموعي بدون ماافهم نزلت

امي گالت

..شجابج انتِ ماما ماتگليلي شجابج تعاي گعدي لاتخافين ان شاء الله ماكو شي حادث صار وياهم

..منو هم عمي وابراهيم

گبل لاتگول اي ضربت وجهي تأكدت من وجوهن