نوايا القلوب..

٤٩

يسعد مساكم حبايب ..

جدا اعتذر منكم مقصرة بحقكم اعرف بس اصبرو عليه يومين تخلص مشاويري واعوضكم احلى تعويض

اكيد وبلا شك البارت مليان سحكات وبدون مراجعة 😁

هذا المقطع شفته جابتلي رابط نشره شبا بوكت تذكرلي الاحداث من صفحة الوالي ناشره وچان مقصود بي شخص بذكرى وفاة واحد راح تعرفونه من خلال السرد الصراحة حبيته بي رسالة
واتقصدت اشاركه هنا

....

ابو تمار..

ايام صعبة انضافت الايام عمري الي احس بكل نفس اجره بيها اصارع الحياة

شنو حالي وانه اشوف صديق روحي وحزام ظهري وهيبتنا كلنا گدامي متعلعل
باسم ماحاسبه عم العم بعيد ابعد من علاقتنا

حاسبه اخ واكثر اشوف ابوي بي واتذكر شلون عيونه بفخر تلمع وهو يحجي عنه خاص اخر سنة بحياته حيل اتعلقو ابعضهم

لو اتذكر شلون برد گلبي بكتله للخانو العشرة وبسببهم انداس بيتنا ودم ابوي سال

شگد ماجنت اتلوع بسجنه بس مأمن عليه واكول السنين تخلص مهما طالت بس اليوم غير

اشوفه يصارع الحياة احس روحي مرهونه بروحه
ولحظات انسى روحي وانه اراقبه وافوت نفس وياه الگه روحي مختنگ وفحطان
ومابيدي شي عليه

ايام مرت حچايه مايگدر يحجي
تعب حيل وتعبنا اضعاف تعبه كل شويه مطلعين شخص ميت حتى الموت الطبيعي صرنا نتمناه وصار اعجاز  بالنسبة النا
هنيالك من تموت بين اهلك واحبابك يتولون غسلك وتشييعك ودفنك هذه نعمة ماچنا نحس بيها
صعبة جنازة تطلع غريبة لا اخ لا اب لا اهل لا صوت ناعيه فاگده كلشي سكته اكثر شي راعبني ان الجنازة تطلع بأدين اغراب والوحشة تبدي من اول لحظات كلشي مر علينا وشفناه بس هذه صعبة ماجاي اهضم فكرتها

شفت حالات اشكال بيهن الزينه وبيهن تزيد فوگ قهري قهر

اتذكر ولد حتى بالنوم ينام وابوه بحضنه وساند ظهر ابوه بصدره حتى يتنفس براحته لأن بالنوم يصعب عليه النفس
انه من يمي دعيت ربي يوفقه على هذا البر الوضع يخنك كمامات نطبگ اكثر من وحده كفوف تلبيسه للوقاية كلشي يخنگ وتحس الموت بكل مكان اتكأبت حيل 
شفت ناس انشمرو من اول اصابتهم  ومادرو عنهم اهلهم واحنا المرافقين العدنا مرضى اهتمينا بيهم والممرضين المتبرعين ماقصرو هم

اغلب المرضى الي ماوياهم احد  ماتو قهر وغربة مو من المرض جنت اشوف حالتهم افضل هواي حتى من حالة عمي بس بالنهاية ماتو