نوايا القلوب..

٢٠

يسعد مساكم بكل خير حبايبي

صيام مقبول وتقبل الله طاعاتكم

....

ابو تمار ...

مثل عادتها ابرود وملامح جامدة ردت

..الله جابك الوالي تعال خلصني امي موتتني بعدهي الهسه تلمح للموضوع القديم الي بنوه هم بينهم بوجود والدي الله يرحمه الكل كان متفق اني الاحمد وأحمد الي ومرت السنين وراحت وطرقنا افترقت للأبد وبعدهن يلمحن عدم زواجي وكرهي للزواج واغلب الرجال بسبب انانيتهم هو أن اني عايشه على ذكرى الزفت ابن الزفت
قنعهن يغيرن هالفكرة عني وإذا مقتنعات بيها خلي يحتفظن بيها النفسهن مايحتاج يذكرني بيها كل فتره

حجت اخر جملة ورجفت شفتها بعبرة سكتت تخفي عبرتها

حاچيت امي

..ماله داعي هالكلام منو احمد وشنو قيمته حتى تحطم نفسها علموده ريام عاقلة وذكية حتى لو صدگ الفكرة الزرعتوها بالماضي أثرت بيها تگدر تتخطاها واثق منها ومن إيمانها وتربيتها
كافي ملحة بهالموضوع تركوها مو صغيرة هي

ردت امي بدون إلحاح حست وجودي بينهن مو بوقته وكلامها بيه احراج الي والهن

..اني الوحدي من قهري احچي هيج لاتاخذ بكلامي انت.. ولاتلومني  ياامي كل قسمة تجيها ماتتعوض وإذا انرفضت كل هالفرص بعد كم سنة ماتحصلها خو ماتظل وقف

..الله يرضا عليج يمه الي تگوليه صح وفاهمه أنه بس لاترحين زايد باقناعج وتتهميها بشي مو هين لا عليها ولا علينا ولا عليه انه بالذات السمعته مايرضيني واخر مره اسمعه بهالبيت

يعني هي رافضة الزواج شبيدنا مثلا نزفها دفع ماترهم خليها هي اعرف بروحها مادام ماشية صح ومامهتمه غير بنفسها ودراستها مالنا حق ندقق بالنوايا وأنتِ تعرفين مو انه الاعلمج كلنا اتعلمنا منج على كيفج وياها ووي روحج

صعدت بدلت ونزلت بلغتهم باچر التحاقي وحاجيت مهجة وطلبت منها تحجيلي محاولة أخيرة گالت افضل نتراسل فعلا راسلتني
وبدفعة وحده حچتلي المنتظرة من فترة طويله والي ياما حاولت اكون وياها هادئ مأمنها الأبعد حد حسب كلام الطبيب نصف علاجها يعتمد على هالمرحلة

تحجي مخاوفها وتكون بجانبها

اشتعلت نار بيه حاولت اخمدها اشتعل جمر بروحي وگلبي

القاهرني مو گادر اسوي شي غير استوعب الكلام وافهم منها للأخير

بدون اي ردة فعل تثير خوف بنفسها لو حزن
يعني حسب كلام الطبيب ممنوع تشوف مني خوف
او نظرة عطف لازم اتعامل طبيعي وي موقف وحدث مو طبيعي ابد

اول مره احس بروحي أنه الاحتاج طبيب يسمع مني ويريحني
ويسحب شكو طاقة سلبية بروحي عبالك بهالحدث انعاد كلشي عشته وشفته من تعب وحزن وقلق وعركات صديتها ومحاولات القتلي أو تخويفي وخسارتي كلهن اهون من هذا السمعته