نوايا القلوب..

٥

يسعد صباح الغالين البارت مطول يعوض عن بارتين
ردت اكمله كله يلا ينزل لأن بيه تفاصيل اتعب الكاتب والقارئ بس احداث مترابطه مااكدر اتجاوزها واكتبها بدون تفاصيل دقيقة حتى ندخل بالاحداث الباقية بصورة اسلس

لهذا التمسكم العذر ♥️

.....

شبا ..

جنت واگفه يم امي وعمتي سهام وحده تشنگ بالعجين وحده تخبز اخذتلي خبزة ثلمت من طرفها وعدلت گصيبتي خليتها ع جهة ارد افتح موضوع وخايفه يرزلني

توهم رادن يسخرني بشغله گتلهن بعدني صغيره يگللي بس بالسوالف شاطرة

واني صدگ اريد اكمل واعرف تفاصيل صارت قبلي محد يعاملني معاملة محترمة هنا ويقدرني غير عمه اسيل وبعدها ابو تمار بس ابو تمار يشوفني طفلة حاله حال البقية من عماتي وامي والبنات

بوقت الذكريات طفلة بس من يردن يسخرن لا اني مره جبيره وشابه ومن يردن يحجلي ع الاحتشام وسوالف الدين اطلع مكلفة حتى عباية لبست صح بقناعة لأن طويله وعليه عين  ومعروفه بنت السادة ويصير تركيز عليه من المنطقة
باعتبار خواتي عماتي كلنا مبينين من عائلة ملتزمة دينيا ومحتشمة
يعني هسه اني حالي من حالهن

لاتستغربون معاملتهم الي لان هنا اني ب٢٠١٤ عمري ١٢سنة

بس فارضة نفسي بالقوة عليهم ارد ارضي فضولي من هذا العمر التفكير اكلني ارد أحل هوايه الغاز واسماء اعرفها الها دخل بحياتنا بس مجاي اربط بينهم

بالمرحلة الآنه بيها بالمتوسطة البنات يكتبون ذكريات وخواطر عن الصداقة وكل بنيه تسجل ذكرى
وهالامور واني اكتب اهم المواقف الي خلت عماتي يتعلقن بأبويه وبينا الهذال الحد

ومواقف ابو تمار وياهن الي تفوق موقف الولد الأمه ابو تمار ابنهن كلهن وكلهن أمهاته

مااحسه ولد الامي وبس وحياتنا اشوفها تختلف هوايه عن حياة باقي البنات لهذا من أكثر من سنة واني كل فكري ارد اعرف اسرار الماضي الحد قبل فتره يلا گدرت اقنع عمتي تحجيلي وماقصرت بس اريد اسمع من الكل مينطون مجال بمحاولة مني افتح مواضيع وياهن

گلت

..يمه بعد اقل من اسبوع الذكرى العاشرة لأستشهاد أبويه الله يرحمه هم راح يسوي الوالي مجلس تأبيني وثواب مثل كل سنة لو لا

ردت بعد مااترحمت لابويه وهي تعقج وجهه من حرارة التنور وشايله بجفها گرصة الخبز الي تشهي من أيدها الحلوه

..اي يسوي واحنا هم نسوي ثواب وختمة قرآن ومجلس قابل نگطعها بأيام خيرنا بذيج ايامنا الصعبة ماگطعناها

وعمتي ردت بأصرار

.. مادام النفس بينا ذكراه تتجدد وهو طيب ذكره باثره للناس وشجاعته وعامر بوجود ابو تمار مثله وزايد عليه