نوايا القلوب..

١٥

يسعد اوقاتكم حبايبي ♥️

.....

شبا..

اتندمت هوايه حجيت المؤمل ورحت استفسر منه بدون ماافهم اتمرض حيل واتغير ظليت بقلق وندمانه كل شويه احاجيه ارد اخفف منه يگلي موذنبج أنتِ ومعليج بالصور بس الذكرتيه لاتحجين بي ابد الأي واحد اذا صدگ تحبيني وتعتبريني أخوج خلي بينا سر افضل وهو شي مو حلو تكبرين وتفتهميه

وعدته مااحجي وفعلا ماحجيت حتى من عمتي اسيل رادت تفهم مني انطيتها غير اسباب ابد مالها علاقة بالصار

ابو تمار بعد مااجانه جيه سريعة وطلع مؤمل گال حضرولي حمام بلكي اتنشط حتى اكل وأخذ علاجي
فرح حيل ابو تمار جاي متعني عليه

مادامتلنا هالفرحة وانگلب بيتنا من اجت زهراء ترعد حجتلنا الصار وي ابو تمار

وگالت الجدة هالمرة مالج علاقة بيه حتى لو زعل روحي سلامته اهم من رضاه

هو مايحب أحد يطلب مساعدة على كل موضوع وخاص امهاتي مايقبل عليهن يتوسلن بأحد مهما كان
‏
زهراء گالت اذا ماترحن انتن اروح أنه وخل يزعل سهل زعله اهم شي سلامته حكومة هاي ترى وإجراءات اطوول مايهتمون الحرگة گلوبنا ولا يعلمون الغيب ويعرفون العداوات

جدة هم ماقصرت

اخذت ابراهيم وراحت هو أكثر من الكل مخبوص وتليفونه ابد ماسكت وعرفت ابابنا واگفين عابد وشكم واحد من اخوانه للحيطة خاف يستفردون بينا بغيابه على مايوصلون عمامي مناك

لأن  اتصلوا گالو جايين من العمارة ولد عمتي ذهب وولد عم ابوي

انتظرنا على نار الحد ما اجت جدة وجهه مطعون طعن من التعب والقهر

كلنا التمينا عليها بشري حصلتيه شحجه شگال

گالت

..انطني ماي اشرب يبس ريجي

انطيتها مي شربت وأخذت حبايه تحت اللسان هم

گالت رحت و جزاهم الله خير اهله من درو بيه وعرفوني فوتوني وخابروه چان طالع ماطول واجه رحب بينا واستقبلنا واترحم للمرحوم وذكر أيامه عمت عيني
وگال شعندج أم السادة گولي

گتله

..عندي من الهضم شكبان
امشونا ندور الوليان

صفگ بيده وگال مع الأسف على الدنيا مانصفت الزين علويه الله يساعدج وأنه بخدمتج

وأنه يمه تعرفني الهذا  عمري واحس بروحي ربات عز و دلال رغم كل الجرالي الصارلي بس يصعب عليه أتوسل ولا اعرف اتملگ واتلوگ شكيت البيـه مثل ماهو وإذا بي هده مايگصر من گال الدنيا مانصفت الزين وحجه الصدگ هو

كتله

..الدنيا يوم صلفة ويوم دهرية
طگه فوگ طگه واوجرت بيه
وتوجع حيل ياطگة التالية