نوايا القلوب..

٢١

يسعد مساكم حبايبي
اسفة ع التأخير وارجوا المعذرة
جنت نايمه مستشفى وي عمتي اجيت العصر والبارت عندي جاهز ع النص كملته من فرغت أمانة بنات ادعولها

.....

بعد ماسيطرت ع السياقة ظليت اشغلهم وي باسم
جريتهم المنطقة زراعية من يم السريع نزلت الها من الشارع لحگونا

ظليت اشغل بيهم السيارة مالتهم بيها تلاثة تقريبا والسيارة الي طلعت قبلهم مالحگتهم مااعرف اتعمدت تتركهم لو ضيعو جماعتهم من جبناهم لهنا بساتين وارض وعرة وشوارعها ضيگها ومجهولة بس للفايتها ويعرفها
اتصلت بعابد

ابلغه گال دقائق واحنا يمكم

..لاتجي أمن البستان والدواجن والمنحل احتمال خطة الهاء منهم
شو ماجاي يواجه صدگ
لاتبلغ أحد عابد بس افتح عينك زين أنت والجماعة

..لايظل بالك ولاتخليني محتار آمنوا نفسكم واتصلوا بيه

من فتنا جوه بعمق الأراضي هم قررو ينسحبون ماخاطرو بفوتتهم ورانا وهنا صار لازم احنا نلاحقهم حركنا وراهم بسرعة خيالية
اخذت تليفوني اقرا الرسالة من الظل يحذرني من مواجهته ويطلب مني الانسحاب

كاتب

..هذا زعطوط لاتهتمله بروح ابوك لاتواجهونه علاجه يمي

مااخذت بكلامه لأن حسيته شخص يخصه

اجتني رسالة ثانية

..اخذت كلامي بمحمل الجد لو لا؟ أخذه والا تندم ترى مكالمة وحده للجهات الامنية الطرفين تنشالون

مااهتميت اله ودست سرعة زيادة صار كل همي اعرف منو هم الي بالسيارة ومنو الظل هذا معقولة احمد؟
اني الي اشك بيه هو من ولد عادل أو علاء

أشرت الباسم يترك السلاح ونستمر بملاحقتهم  بس السريع بي سيطرات أمنية وهم وگفو الهجوم وانسحبو
اذا ظلينا هيج القضية تفتر علينا ونصير احنا الي نطاردهم

صحت

..باسم صور رقم السيارة ركز بتصويرها عوف السلاح .. مبينة حكومية

بالگوة يلا گدر يصورها گبل لاتضيع بين زحمة السيارات

الحد ما ضاعت علينا والحقيقة أنه اتعمدت اضيعها بعد مااخذت احتياطي

باسم ظل يسب ويلعن ويقسم يمين بالله ماراح يتركه مهما يكون وظل يلوم شلون تخليهم يضيعون عنه

.. كل عقلك اخليك تضيع روحك من وراهم للمرة الثانية بيهم واحد يسوه ترجع للحبس علموده  اكو قانون اليوم وحتى لو بي ايدهم طايله نوصلهم والسيارة الحكومية مبينه

..يعني نخليهم يفلتون بعملتهم هاي

..هو يريد يجرنا الساحته وبعدها يتهمنا سوالفهم كلهن مارات علي وشابع منهن اهدأ ليش أنه نزلت بيهم للطريق الزراعي خايف منهم قابل لو اريد اسحبهم