#جاموفوبيا
-الجزء الاول ||
-كتابة ام امن ||
بعنوا((عقد ))
((مستوحى من أحداث واقعية ))
.
.
.
هذا يا حناتى بدت القصة فـ سنة الـ 2010
تحديداً فى نص شهر "5"...في حوش من الحياش الليبية البسيطة
تحديداً فى وحدة من مناطق الجبل الاخضر...بعيدة ومنطقة صغيرة
في حويش بأول الشارع ...قدامه سيارة ...وشخص مطبس يفتش فى الشنطة الي بيده ...حسب الفلوس الي خذهم وتذكر كلامه مع شريكه
عد الفلوس بفرحه عارمة ...ونزل من السيارة وخش للحوش...رقى فوق طول وفتح شقته
وتحت ...فى الدور الاول للحوش هذا
ومن داخل المطبخ نسمعو فيها تنادى : هنيوة يا هنيوة وينك ؟!
هناء وقتها كانت قاعدة تقرطس في دبشها وحطاته بالدولاب..."نعم يا امي شويا بس "
حاكمة ...اطيب فى الغداء ...تعالى عاونيني جايين انسابة خوك اليوم
تنهدت ...باهي شويا ...اهو جيت
خشت هناء المطبخ وبدت تعاون في امها
وفوق هالحوش على الدور الثانى ...في شقتين متقابلات وحدة مش مشطبه باين اما الثانيه كاملة متكاملة ...نخشو الشقه
نلقوه واقف عليها ...هي نوضي عاوني امي وهناء خوك جاي بعد شويا
شافتله ...عليش نعاونهن ؟ ما تذكرت كلام الدكتوره على حملي امس
سعد بضيق ...عارفه يا نوجا بس لازم تنوضي تعاونيهم حتى شويه
رجعت تسطحت وقربت الغطا منها اكثر...حبيبى بالجو فوتها منقدرش ننزل وانت عارف هناء لسانها طويل وانا نتوحم
بكلمتين ضحكت عليه ...وقرر يخليها وهو يمشي يخدم على حاله...نزل لقا هناء قاعده تقرض في الخضرا بيديرن مبوخ "كسكسو "
: قتلك هناء تعالى
هناء قربت منه ...نعم
سعد بتسال ...ايش ناقص الحوش ايش خاصه ؟!
هناء بتفكير ...ما ناقص شيء باتي جايب كل حاجه ...اه صحيح نبو بس فلفل نديرو مسير
هز راسه ...باهي
طلع وهناء رجعت تقرض وتعاون في امها...كانت امها تطيب
: فريدة مازالت ماطلعت
عقدة هناء حواجبها...ماشفت بنات فصلها يا امي
لوت فمها بس ما عمرها طولت هالتطويلة !!
هناء بقلق : بالك تراجع مع صحباتها
امها تلفتت عليها ...بنظرة ..."والله ماضني "
