#جاموفوبيا((رهاب الزواج))
-(( الجزء الثامن والعشرون))
-(( بعنوان السجن الدافيّ ))
- كتابة: أم أمـن 🤍✨
**********************
عند الناجي
خش الناجي على أشرف وقعد مقابله: انست..والحمدلله على السلامة
أشرف: الله يانسك.
الناجي: ها عاد اكيد فكرت في هالاسبوعين.
أشرف: اها..والي وصلتله اني مانقدرش ياحاج..الموضوع صعب وأنا ((قص عليه))
الناجي: خلاص مش ضروري..كان ماتقدرش مانبيش نحملك حاجه فوق طاقتك.
أشرف استغرب: وشن بتدير؟!
الناجي ناض: قبل نبيك انت..لكن كان ماصار شيء هناء توه ناخذها لمحسن خوي وخلاص
عقد حواجبه عمي محسن!!!
الناطي هز راسه: ايوه عمك محسن..نا كلمته من فترة وقتله نبي نرد مراة المرحوم على واحد من خوته..لكن ماضنيش يوافقوا.. كان ما حد يبيها توه نكلمك.
أنصدم مش متوقع بوه يفكر بالطريقة هذي.. سكت شويه يسمع..وبوه كمل كلامه على أنه حكى مع اب هناء من فترة وأحمد مش معترض
أشرف شافله : وهوا شنو رايه؟!
الناجي: قالي شوف الشباب..كان ماحد يبيها نا نبيها ومعاها بلي تبيه مراة ارملة وصغيرة وبعيالها نكسب اجرها.
حز في نفسه الموقف..ناض وشاف لبوه: وهلها شن رايهم؟!
الناجي: تبي الحق خوها سعد مكانش يبي يعطيها بكل.. سافر من أسبوعين لمالطا كلمت أحمد قالي أنا البنت شنو نودلها غير راجل يعاونها على عيالها..ويقعد مش براني منكم فيكم
أشرف رفع حاجبه: يعني هو موافق على عمي؟!
الناجي بإيجاب: الراجل مش معترض تاخذ واحد منكم واحد من عمامك واحد من عيال عمك..المهم واحد من عيلتنا على خاطر العيال.
أشرف بلع ريقه: شفت الشباب..يعني محمد ولا قيس مدامك متبيش ناصر ياخذها.
تنهد..مش فاهم ولده عليش مسكر رأسه ويبي حد من خوته ياخذها وهو لا لكن متوقع الموضوع هو نهلة
الناجي : مانقدرش محمد وقيس بعيالهم...وناصر على أساس مش عارفه مش قد المسؤولية..عمك صح كبير عليها ونشهد بالله كبير واجد وبينهم عمر لكن هو الي نتهنى عليها معاه.
مسح وجه وخذا نفس عميق..زفر بضيق ورفع حاجبه
أشرف: راهو تقعد تستعمل في سياسة من سياساتك العسكرية!
رفع يده وارتسمت على ملامحه ابتسامة خفية
الناجي: لا نحن مش في محور من محاورك يا أشرف
