#جاموفوبيا (( رهاب الزواج ))
-(( الجزء الثامن والأربعون ))
-(( بعنوان أنهيار / أزمة 1 ))
سبحان الله وبحمده
عدد خلقه ورضا نفسه
وزنه عرشه ومداد كلماته
للكاتبة؛ أم أمن
ملاحظة هذا الجزء تم قسمته على ثلاث إجزاء أخرى لزخم أحداثه
شكر لأي حد سأل عني الفترة الي فاتت بالنسبة للناس الي عذرتني شهادة بالله أنكم أولاد أصل وفوق هالرأس من فوق قراءة ممتعة
*******************
عند عيت الناجي
في حوش العيلة تحت
كان عزو واقف قدام الباب وشاف رمزي وأمه وقت نزلوا وخشوا خش وراهم
خشت أسماء وبنتها ومعاهم رمزي كان الجو توتر واجد تفاجئت باكره بجيتهم وقتها سارة ورغد وشادية تحشموا من رمزي وخضوا للمطبخ
رمزي خش جوه واخذ راحته بزيادة في حوش عمته مروه تضايقت وجت بتمشي أمها ضغطت على يدها
باكره بصوت واطي : ما عندك وين ماشية
شافت لأمها وبعدين شافت ليدها وكيف ضاغطة عليه بقوة القوة نفسها الي تملكتها وقتها وقعدت مكانها
أسماء قربت منهن : السلام عليكم، الحمدلله على سلامتك يا مريوه
مروه بمجاملة : الله يسلمك
أسماء سلمت على باكره بالخد : الحمدلله يا باكره ياخيتي ربي جبر بخاطرك وردتلك بنيتك بصحيحتها ريتي الحزن ما فيش منه بركة
باكره بمجاملة : سلمك يا أسميوة تفضلي تريحي
قربت منها هنيده وسلمت عليها : الحمدلله على سلامة مروه يا عمتي
باكره : الله يسلمك
رمزي وعيونه على مروه : الحمدلله على سلامتك
باكره فنصت فيه ومروه ردت بضيق : الله يسلمك
بعد دقائق من التوتر قعدت أسماء وبناتها ورمزي بكل صحة وجه قريب على أمه وحاط رجل فوق رجل باكره كانت مش قادرة تتكلم ومروه متضايقة منه
أسماء : الحمدلله يا مريوه الي سلمك لراجلك وبنيتك
مروه مبتسمة بإقتضاب : الله يسلمك
هنيدة : شن قالوا الدكاترة على وضعك توه ؟
داخل المطبخ
رغد نفخت بضيق : معقولة هكي يخش رمزي مع الصبايا
ساره واقفة على الغاز تطيب في القهوة : شن تديريها هذا حد عقله
شادية : الحق مش عليه على أمه وأخته كان هو ما يفهم المفروض هما ينبهوه معقوله خش من غير ما يتنحنح غير ستر ربي وكنا مستورات يا بنات
