#جاموفوبيا
-الجزء التاسع "3 والأخير 🌸" ||
-بعنوان "عُقد " ||
-كتابة : أم أمن ||
عسى الله أن يمسح على قلوبنا قلبًا قلبًا، وينفخ في أرواحنا من لدنه الطمأنينة، ويعطينا لحدّ الرضا والغنى والعزة.
^^^^^^^^^
عند الشباب ...بعد كملو ابتسم قيس : منور يا ولد اميّ
وانت منور يا بُونسيب
ابتسم كلاهما : تسلم
خش حسين عليهم ...نقز عدنان "ولد قيس " : عمو يا عمو وجرا عليه حضنه
مسح على ظهره وعيونه على اشرف : نسمع فيك مبدري
اشرف حك راسه : هذا انا وفارس
تلفت حسين على فارس هز راسه : انست يا فارس
فارس ناض وسلم عليه ..."الله يأنسك يا حسين كل شيء ع البركه "
" تسلم ...العقبى عندك "
ابتسم ابتسامة غير مفهومة يمكن بوقتها قلبه قبل لسانه قال أمين ...ولو حسين كان عارف سبب ابتسامته كان كسرله أسنانه وخلاه يروح لـ هله بدونهم .
دقايق وحطو البنات الغداء وخشو الشباب جابو السفر وكلمو عيت الناجى جيرانهم وكان بوهم جاي كضيف مش كصاحب المناسبة والجميع منتبه ومركز على النقطة هذى !.
على سفرة الاكل التمو ...كان قيس يلقب في الطعام تقليب شافله بوه : عليش ما تاكل !
قيس شافله ورجع شاف للسفرة قدامه ...سكت لوهلة نغزه اشرف غمض عيونه : لا شيء نفكر في الشغل
ناجى حس بيه مش تمام : ربي يعاونك ان شاء الله
قيس : امين
فارس ناض بعد وقت ومشى يغسل في الحنفية الي بجنب الخيمه طبس عليها غسل على السريع وتلفت بيمشي لقى مروة تجري مع مجموعة بنات صغار بعيد وبيدها شكارة ظن انها خبزه
: انا فزت
عدنان : لا انت غشيتي
البنت : صح انت غشيتي
رفعت حاجبها : انا غشيت ف شنو يا كذاب منك الها
تلفتت ع ونسه : توه انا غشيت
هزت راسها : شويه ياملوى
البنت خذتها بجدية : معاش نلعبو معاك انت غشاشة
عدنا خذا موقف لانه البنت هذي زي جوه وتعرف عليها وقعدو اصحاب : اها صح يا عميمة
مشو هما الاثنين وهي انزعجت ونست انهم اطفال تلفتت ع ونسه : وانتِ ؟
قربت منها : صاح انت غشيتي يا ملوى لكن انت غاليه عليا
طبست عليها وحطت يديها ع كتوفها : انا والله ماغشيت
