#جاموفوبيا
-الجزء السابع ||
-بعنوان "عُقد "||
-كتابة : om amen 🌸
---------
صباح يوم جديد ...يوم الأحد 2012/5/20
اليوم الي كان بداية تغييرات جديدة في حياة الجميع ...من حوش عيت الناجى حسنيه نزلت من السياره ...من الجهه الثانيه نزل ربيبها "ولد راجلها " حسين بعد جابها من حوش بوه الثاني
خشت حسنيه ...لقت الدنيا حايسه ...وباكره مكلمه زوجة خوها الوحيد " الي هي أم نهله " عشان تمشي معاها ...ولان بناتها متخليش فيهم وحدهم جابتهم معاها ونهلة كانت شايفتها فرصه ترضي اشرف فيها لكن كعادته طلع بدري للورشه
: قعمزي قعمزي يا أنهيله عليش مصبيه !
تدور عليه بعيونها نزلتهن ...شيء أحلام قاعده
باكره : قاعده في الكوجينا شويه ...ونويرا في المدرسه هي وناصر
هزت راسها ...اه باهي
نبيلة : ها يا باكره لمن البنت هذي وشنو شكلها
باكره : هذي بنت عيت ال *** من منطقة ال ***
: مشوار بعيد وطريقها قديمه تعب ليش ماخذيتو من هنا
ابتسمت بصعوبة : اخت صاحبه ...اما شكلها كويس مفيش حاجه ماشي حاله
نبيلة : كيف ماشي حاله
باكره : ماشي حاله ...مش الشكل الي يناسب حسين لكن مدامه اخت صاحبه وهو راضي من ناحيتهم ...ما عندي ما ندير
شافت لـ مرات خوها ونهله ركزت معاهن وكيف مش عاجبتها هناء... خافت حتى هي بيوم ما تكون في نفس الخانة هذى لذا لازم تبدا تشتغل على رىحها من توه لعند تكسب عمتها!
قبل ماينطق أي حد في الحوش بكلمه خشت عليهن حسنيه: السلام عليكم
وحسين وراها حتى هو... بعد سلام وكلام اشر لـ أمه ناضت ولحقاته: ها شنو؟!
واقفين عند باب ممر دار البنات... يا أمى بعدين نمشو للعرب تطلبي وتقوليلهم الفرح الخميس هذا لا الخميس الاخر
شهقت وعيونها جحضت من الصدمة : شنو!
كيف الخميس هذا
: اسسس وطي صوتك الخميس هذا لا الخميس الاخر
: لا لا غير امتى نلحقو نحن وامتى يلحقو هما
: كيف نلحقو
: نوتو حاجات الفرح وهي توتي روحها... فوق هذا لازم نجيبولها ذهب ونجيبو كساوي لـ أمها وأختها
عقد حواجبه...فرح شنو الي تبي تديريه لها... ناسيه خوها قابض حق المهر...كلا الذهب هو خات بس وسلسله معنديش لها حاجه اخرى
: شن بيقولو الناس
: ماتعزميش حد هلك بس وعمامي الكبار... وهلها على كيفها تعزم ولا لا
