#جاموفوبيا ((رُهاب الزواج))
(( الجزء العشرُون 🤍))
بعنوان " ع أمل "
للكاتبة : أم أمن
(قمر سيدنا النبي صلوا عليه وسلموا تسليما)
هُنا نقف ع أمل الحياة
ع أمل أن تمر السنوات وتزدهر البلاد، ع أمل أن يلتفت أحد لحالها بقلب روؤف يخشى الله، ع أمل أن يحيى الشعب الكريم حياةً كريمة هادئة
هادئة فقط...
🌸🌸🌸🌸🌸🌸🌸🌸
3/10/2014 - الجمعة
وقفة عيد الأضحى
"الفجر"
لا صوت يعلُو فوق صوت الرصاص "محور عين مارة"
فوق مبنى سكني مهجور من سكانه
أشرف وقف إطلاق النار...دور عيونه في كل مكان يدور عن حد...لقى السيارات الي رمن عليهم بدري أختفوا وتلفت ع نبيل"جندي معاه " كان يدير في مكالمه بعيد عنه
سكر نبيل وقرب من أشرف : خلاص قالوا وقفوا
وتلفت شاف الشوارع فاضيه: شنو مشوا؟!
أشرف نزل السلاح الي في يده: مكانوش واجد وفي مقاومه برضوا من الناس تحت
تنهد نبيل : هالموّال باين مطول
أشرف بحيره: مش عارف لأمتى والكارثة عين مارة ماحسبتها هكِ.. قصدي يعني المحور مانحسابش بالسوء هذا
نيبل بجديه: قديش لهم ينادوا القيادات الي هنا يقولوا يا عرب المحور فاضي أشقوا بيه، لكن هات من يسمع
أشرف مشى جهة تنك فوق المبنى...كان بحذاه شنطته فتحها يلم في حاجاته مسك هاتفه وشغله لقى مكالمات فائته من بوه
عاود أتصل بيه لكن ه مارد...نزلوا نبيل "من القبه" وأشرف ومشوا للكتيبة المواليّن لها وكانت تحت قيادة عقيد من مدينة القبه.
ع الظهر في حوش عيت الناجي الأغلب نائم
- قريب الظهر
في شقة عيت حسين
كانت هناء راقده ومدده ذراعها متوسدينها سُلاف وحيان
سُلاف راقده على بطنها وحاطه يدها في شعر أمها
حسين رن تيليفونه ناض من جنبهم بسرعه رد عليه وطلع بره
حسين مسك ع رقبته من وراء : ايوه
أيمن : صباح الخير يا سونا كل عام وانت بخير
حسين تثاءب: صباح النور...وانت بألف خير يا غالي.
أيمن: تسلم إن شاء الله قتلك اليوم بتفتح المزرعه والا لا؟!
حسين مسح وجهه : أكيده بكره العيد ف اكيد في ناس واجد ح تشري اليوم
