#جاموفوبيا(( رهاب الزواج ))
(( الجزء السادس والثلاثون ))
(( بعنوان "حافة الأنهيار" ))
كتابة أم أمـن🌸،
******************
عند عيت الناجي
الساعة 1:15 ص
نورا قاعده على سريرها تقلب في أوراق الشيت متاعها لافه شعرها فوق وحاطه القلم في فمها وتقرأ في المكتوب وعيونها بيتسكروا...نعسانة وتقاوم على الأقل تكمل جزئية تضمن بيها درجة النجاح بكره
نورا تثاءبت: أوووف..الباين ضروري من القهوة
ناضت وسكرت شيتها: نمشي نديرها بالك نصحصح
طلعت من دارها ومشت في الممر لقت باب دار أمها مفتوح والضي والع أستغربت لأن مش من عوايد أمها السهر
طقطقت الباب
باكره: خشي
فتحت نورا الباب وشافت لأمها كانت مستندة على السرير..وباين عليها متضايقة
نورا بأستغراب: أمي.. غريبة مازال مارقديتش ؟
باكره شافتلها: مش جايني نوم..مشغولة
نورا قربت منها: على من ؟
باكره بضيق: خوك
نورا: منو فيهم
باكره تنهدت: أشرف طلع من المغرب ولاتوه ماروح..بالله عليك وين قاعد هالوقت كله ؟
نورا: عادي ما إنت عارفه أول ما يروح من التوكه متاعه يمشي مع جماعته بره يتعشوا بره ويغيروا جو
باكره خبطت كفوف يديها في بعضهم: بالله عليك توه وقتها..وقت طلوع ولا تغير جو ثلاثة رجاله عسكرية أيش يطلع فيهم في هاليل
نورا ربتت على كتف أمها: بشويا يا أمي..الأنفعال مش كويس لقلبك شن قالك الدكتور
باكره مسحت وجها: صبرني ياربي..والله خوتك هم الي ح يجلطوني..جيبي تيليفونك خليني نكلمه ونشوف أمتى يروح
نورا شافت لأمها: هيا هيا
نورا: حاضر...توه نكلمه
طلعت من دار أمها وخشت لدارها..أتصلت بأشرف
أشرف لقاها تتصل..مشى بعيد عن نوح ورد عليها
أشرف: أيوه يا نورا
نورا طلعت من دارها: الو يا أشرف..وينك لاتوه
أشرف: قاعد مع الجماعة..عليش في حاجة؟!
نورا خشت على أمها: لا مفيش حاجة..أمي تبي تكلمك بس..من بدري وهيا مشغولة عليك
أشرف تنهد: أعطيها ليا
باكره خذت التيليفون: وينك ياولد..عارف الساعة كام..أمتى تبي تلايم على الحوش..بالك ساد!
