#جاموفوبيا((رهاب الزواج))
(( الواحِد والعشرون ))
بعنوان (( ع أمل))
كتابة: أم امن 🌸
.
.
والله إن من أعجب الأذكار التي قد لا يتصور العقل فضلها:
( لا إله إلا الله وحده لا شريك له، له الملك وله الحمد وهو على كل شيء قدير )
من قالها في اليوم مئة مرة كتبت له مئة حسنة ومحيت عنه مئة سيئة وكانت له حرزًا من الشيطان في يومه، ولم يأتِ أحد بأفضل مما جاء به!
***************
عند أهل ناصف
مروه ناضت الصبح بدري خذت عهد ودوشتلها وجففتلها شعرها...مشت لدولابها فتحاته طلعت منها صندوق اكسسواراتها وخذت سلسلة الفراشة
ابتسمت بعد تذكرت خيرية خالة رغد الي عطتها لها هديه زمان لما كانت مع قيس في حوشه لكن للأسف معاش تجي عليها شافتلها بعدين قطعتها سحبت الفراشة منها وحطتها في سلسله ملساء عاديه
جت لعهد ولبستها لها عهد مسكت السلسله بطرف يدها بتقطعها مروه خبطتها على يديها بالخفيف: احا...ماتقطعيهاش ياماما خليها
جابت المشط وبدت تمشطلها وبيدها هاتف بوها
عهد ماسكته وتلعب عليه رن برقم غريب مروه عقدت حواجبها وخذاته منها بدت تنادي
مروه : ناصف ناصف...تعالى تيليفونك يرن
خش عليها قرب منهن وخذا التيليفون توتر وبغصب قال: رديتوا عليها المكالمة والا 😤؟!
مروه بنفي: لا والله ما ردينا عليه فصل بروحه
بشك شافلها: ردي بالك، بعدين عهد معاش تخليها تقربه التيليفون فاهمه والا؟!
مروه بإستغراب: حسبتك عطيته لها والله
فنص فيها: فوتي الأستعباط حاجتي معاش تقربيها لا انت ولا بنتك فاهمه
مروه بضيق : تمام
ناضت وعهد تشوفلهم طلعت مروه برا الدار تنهد ولحقها خشت للحمام غسلت يديها وطلعت لقاته قدامها
ناصف: أسف مش بقصدي
بزعل: بقصدك والا مش بقصدك معاش تهزبني قدام عهد
ناصف شدها من ذراعها وقربها له لف يده ع كتافها ومشى بيها جهة الدار: أسف والله
مروه مشيحة بوجها بعيد عنه: خليني عنك يا ناصف، مش مسامحتك لأنها مش أول مرة
ناصف رفع حاجبه: شوف الخبيثة شوف!
مروه بجديه تباعدت عنه: ناصف انت عارف اني ما نتحملش الأسلوب هذا بعدين ماهو انت ديما قاعد على تيليفوني وعهد حتى هيا عمري تعاملت بالحدة هذي معاك
رفعت حاجبها: الا اذا كنت شاك فيا هذا شيء ثاني!
ناصف غير الموضوع: لا مش شاك ولا شيء غير هيا طلعي الجلابية خلي نلحق على الصلاة
