#جاموفوبيا((رهاب الزواج))
-(( الجزء الرابع والأربعون ))
-(( بعنوان "إنهيار "))
للكاتبة؛ أم أمـن 🌸،
***************************
تلفت هو وخش للشقة مشى للصالة وشاف للسفرة الي مجهزتها مشى قعد على الكنبة وبدأ يأكل وهو يخمم في تغييرها لرأيها كان حاط بباله أنه بيروح ويلقاها مازال مصممة على رأيها لكن الباين في شيء قالب موازينها
بعد ما تغدى رفع السفرة وغسل المواعين مشى للدار وفتح الباب كانت مظلمة وباين عليها أنها ما كانت فيها الأيام الي فاتوا مشى جهة الدولاب وخذا سورية رمادية مخططة بأسود وسروال أسود بدل ونزل على السريع تحت لاحوش أهله قبل مايمشي يشوف مروه
كان ناصر يعدل في التيليفزيون وأمه قاعدة وفي حجرها عهد...وحيان وسلافه يستنوا في ناصر أمتى تجي الأشارة
أشرف واقف على الباب : السلام عليكم
تلفت عليه ناصر : وعليكم السلام...أمتى جيت ؟!!
أشرف شافله : بدري شويا
ناصر رجع يعدل في التيلفزيون: اها...الحمدلله على السلامة
أشرف : الله يسلمك...وشاف لأمه...يام أنا طالع توه بنشوف مروه توصي على شيء
باكره : لا سلامتك...قبل جيتك بشويا روحت مع قيس من عندها
أشرف ما كان يبي يبين يأسه : وشن حالها
باكره تنهدت وهي تعدل في وشاحها : يلطف الله بحالها
أشرف : أمين
تلفت أشرف وطلع بره الحوش ركب سيارته وشغل المكيف وتسقد على طول للمستشفى
في المطبخ
ساره من لما قعدت هنا معاش مشت...وتريحت عند عيت أمها أكثر من الحوش..احتكاكها بمحمد قل لأن أغلب الوقت مع مروه في المستشفى
وهي وهناء ونورا متعاونات كل وحدة عارفة شن لها وشن عليها وحاليا قاعدة تساعد في هناء على العشاء وتتساير هي وياها بالكلام
ساره سكرت الشيشمة وتلفتت على هناء : مشاء الله أول مرة نعرف أن عندك أخت تقرأ في التقنية
هناء تقشر في البطاطا : بطولة عمرك...هذه فريده أختي الصغيرة...وتقرأ معاها بنيت عمي هما الأثنين صاحبات واجد وجايات في نفس العام
ساره : مشاء الله...زي الخوات يعني
هناء أبتسمت وتلفتت عليها : وأكثر بشويا أسرارهم عند بعض ومن نحن صغار وهما في نفس الفصل ونفس الدرج
ساره : ربي يحفظهن...ويوفقهن في قرايتهن...شن نظام القرايا عندهن داخلي ولا يمشن ويجن ولا عيت عمك يسكنو هنا
