#جاموفوبيا(( رهاب الزواج ))
(( الجزء الخامس والثلاثون ))
(( بعنوان "حافة الأنهيار" ))
كتابة أم أمـن🌸،
******************
قدام حوش عيت أحمد..واقف أشرف وطارق قدام الباب..وعبد الرحمن ناض ونفض دبشه من التراب
عبد الرحمن قرب منه: وأنت شن دخلك ؟
طارق تلفت عليه..وأشر على أشرف: هذا راجل أختي الي جاي تبي تتزوجها
أشرف رخى طارق مصدوم...وتلفت على عبد الرحمن الي بان على ملامحه الإرتباك..خاصة من نظرات أشرف له والي ماتبشر بخير أبدا.
أشرف قرب عليه وشده من ياقته: تكلم..الكلام الي سمعته صاح ؟
عبد الرحمن توتر وحط يديه على يدين أشرف
عبد الرحمن: أأ والله مانعرف بيها متزوجة أنا كلمت سعد من فترة..وقلت له على وضعي زوجتي عقيمة..قال عندي أختي أرملة وعندها عيال.. فاقلت عليش ندور أخرى هذي حاجه مجربة قبل.
أشرف توسعوا عيونه بصدمه ودفه..نفخ بضيق وهو يشوفله ومسح شعره للوراء: توه أتصل بالي جاية معاك خذها ووجهك نشوفه هنا سواء زوجتي قاعدة أو لا نخربه لك فاهم ؟!
عبد الرحمن بغضب: ما قتلك ماعنديش العلم..من وين بنعرف أنها متزوجة قول ها ؟
نبيل خبطه على ظهره بقوة: عصا تكسر رأسك إن شاء الله..الراجل قالك ميبيش يشوف وجهك في شارع أنسابته أنت قول تم وضملي فمك هذا.
عبد الرحمن تلفت عليه: وأنت شن دخلك أنت الثاني😒
نبيل رفع كتافه..ونزلهم يشوفله بتوعد: هوا هك..نتدخل أنا حر..المهم هنا مانشوف رقعة وجهك والا هيا رصاصه في رأسك هذا وغيرها مانخسر شيء
أشرف بتأكيد على كلام نبيل: وصاحبك سعد قول له أنك شفتها وماعجباتك..وغير هالكلمتين نسمعك زايد حاجة من هنا والا هنا
شاف لنبيل: توصالي فيه
مرر نظره بين الأثنين وأبتسم نبيل بخبث:بب باهي
عند البنات جوه..الجو مشحون..رنده وأمها مش عارفات مايقولوا وسميحة تهبد من عندها
سميحة: ها يا عروسة ما سمعنا رأيك ؟!
هناء ناضت بضيق: مش موافقة طبعا
سميحة: عليش ؟!
هناء قبل تكلمت: لأن
حاكمه فنصت فيها وضحكت بتوتر: لأن هناء متبيش تسيب عيالها ..أنت شفتيهم بروحك بنية ووليد ومازال صغار ويبو أمهم .
سميحة نزلت فنجان القهوة من يدها: ونحن قلنا مانبو عيالها لا سامح الله ياعمتي بالعكس..خويا ملهوف على العيال..مفيهاش باس كان ربتهم مع خوتهم الجايين إن شاء الله.
