#جاموفوبيا ((رهاب الزواج ))
بعنوان "متاهات المواجهه " ||
" الجزء السادس عشر "2" " ||
اللهم توفيقا يلازم خطاي 🌸
كتابة : أُم أمِن
لأيك قبل 🤍
******************
القبه
.
.
.
السبت
2 / 6 / 2012
الساعة 11 ظهرا..كان سعد يسوق ومسرع شويه بيش يلحقو على إمتحان رنده..قدام المعهد كانت اللجنة المُمتحنة للطلاب بينهى ويمشو بحكم الأغلبية زوار ومن بره المدينة .
وقف سعد..وتلفت عليها : انزلي
رنده فتحت بابها ومشت خشت للساحه لقتها فاضيه من الطلاب..خافت يكونو الناس الي قابلوها وهي طالعه هما المُمتحنين من الصالة الرئيسيه..لدروج الدور الثاني..وصلت لمكتب الشؤون الادارية
طرقت الباب عقد حواجبه وهو يقرى في الملفات ويوازي فيهم : معليش يا عبد الوهاب تره افتح الباب .
هز عبد الوهاب راسه وفتح الباب تباعد وعطاها المجال تخش..قالت : استاذ فضل
رفع حاجبه قعد شويه بيش تذكرها : رنده !
شن في !
رنده متوترة: استاذ ممكن نسألك عن لجنة إمتحان الشفوي وين ؟!
فضل نزل الملف من يده وشاف لـ عبد الوهاب : اللجنة مشت من بدري شويه ولا لا يا عبد الوهاب
بايجاب : اه مشو من بدري..انت امتحنتي !
رنده مصدومه : طلعو !
استاذ راهو أنا تأخرت بس لأن صار عندنا ظرف اختي الصغيرة مرضت ورفعناها للمشفى..انت عارف انا من بره المدينة يعني عارف الطريق قديش طويله ..مع الظرف تأخرت اخرى .
لوى فمه : عارف يا رنده لكن ما عندي ما نديرلك راه..اللجنة جو امتحنوا ومشو.
كمل كلامه: بعدين انت امتحنتي من قبل تحريري وعملي
يعني الامتحان هذا مايلزمكش لو مصفيه الاثنين الي قبل.
رنده: الماده هذي عندي فيها عقده كل موادي مصفيتهم بإذن الله
إلا هذي نجاحي متوقف على امتحان اليوم .
فضل فتح يديه قدامها بتعجب : باهي شن نديرلك انا
انفتح الباب سمع جزء من النقاش : السلام عليكم
ردو عليه : وعليكم السلام
قرب منهم..وحط شنطته على الكرسي : خير شن في
فضل اشرله على رنده : متأخره عن الامتحان وتوه جايه بتمتحن
عُبيده.تلفت على رنده وكان متذكرها..سحب الكرسي الثاني وقعد جنب رفيقه : وباهي شن المشكله عندك ظرف او حاجه .
بصوت مخنوق طبست راسها : اختي يا دكتور عبد الإله تعبت في الصبح ونحن مش من هنا..خوتي رفعوها يعالجو فيها بعدها من الحوش جيت هنا.
