#جاموفوبيا >>
#الجزء_الحادي_عشر >>
-بعنوان "متاهات_وعُقد" >>
إختبارات_الحُب >>
كتابة : ام امن .
***************
عند عيت الناجى ..الفاجعة الي صارت من وقت فات خلتهم متوترين ومتلخبطين وحزانه اما هناء كانت مصدومة ..والكلام الي قعدت تسمع فيه كان مؤذي .
تخبط على فخاذها ..وتبكي مقهورة بكاء ام مكلومه : حيه عليا بنيتي حيه عليا ..غير ايش الي جد علينا !!
والله ما كانت لنا هالمشاكل ولا القصص ..يا ناعليا كان يوم اسود ! يوم جبت المشاكل لحوشي وحطيتها بينا !
بللت حسنيه شفتها ..ومسح على ظهر ضرتها بحنيه ..وعيونها معلقه على هناء الي قاعده في الزاوية واقفه ومحرجه ..شعور بايخ انحطت فيه بوقتها ونظرات عمات حسين بين المشفقه والي نقمت عليها بدون ذنب منها .
قربت احلام منها وعيونها مدمعات ..لفت يديها على كتافها : هي ياهنيوه فوق.
هزت راسها.. وطلعت بيها احلام ومن مدخب الحوش طلعن الاثنين للدروج الي يرفعن لشقة حسين مع رجعت ناصر وكان متضايق من الي صار وهو كيف علم.. يبي يستفسر عن أخته لكن لما شاف هناء مرعوبة وترعش ومعاها احلام حس انه مش الوقت المناسب خش منه جوه وهنا الاثنين مشن فوق.
وفي الشقة فوق 👆
هناء كانت ترعش ..واحلام قربت منها شدت بيديها : حبيبتي ما تعرشيش مش كويسه راه .
قالت بقهر : توه الي صار مني انا عارفه اكيده تقولي زي عمتي انه مله من جيتي انا ..(( قاطعتها )) ..قالت وهي مؤمنة ان الي صار تدبير من ربي لحكمة ما ..قالت محاولة طمئنتها : لا مش منك ..وامي اعذريها محموقه وقلبها نار على مروة ..راه متعرفش شن تقول توه امس عندها نحن بالدنيا خاصة بعد بوي زمان خلانا .
بدت على وجهها ملامح الاستغراب اما احلام ماحبت تحكي عن الي صار معاهم زمان يمكن هناء تاخذ فكرة خاطئة عن بوها وحسين ..وتسببله مشاكل بعدين في حياته الزوجيّة .
تحت ...الجميع في حالة ترقب قلوبهم على ايديهم كل حد يحاول يصبر الاخر ويفهم سبب إنفجار أسطوانة الغاز !
هنيدة قاعده تزازي بولدها جنبها نهلة الي تحاول تسكت عمتها وباكره متبيش اما اسماء خممت خممت بعدين قالت : صدقتي يا باكره ..هو انتو من امتى ياخيتي مش اول مناسبه تديروها خير شكلها قدوم !
تلفتت عليها ومسحت على صدرها : وحياتك ما نريدها ولا نريدلها خلطه غير وحلت فيه سكر راسه وقال اخت صاحبي وهي ايش دارت بس بعد صارت القصة رقت فوق وفاتتنا
وقعدت اسماء تشحن في باكره ..ونهلة تسمع وساكته جنبها هنيدة طبست عليها وقالت هامسة في اذنها : تعلمي الشطارة من امي ..مش عارفه كيف خايبه لمن طالعه
