#جاموفوبيا(( رهاب الزواج ))
-((الجزء الثاني والثلاثون ))
((السجن الدافيّ، والأخير ))
**********************
عند مروه
تلفتت عليه مفزوعه: أأه 😥
أنا كنت"سكتت " بعد لاحظت شكه فيها وعيونه كيف تدور بتركيز على ملامحها بلعت ريقها ورقعتها
مروه بتوتر: نورا أتصلت بيا وأنا نضم في الحوسة بدري تسأل عليك أمتى طلعت ؟!
ناصف برفعة حاجب: عليش ماكانت في الحوش لما جيت خذيتك ؟!
هزت رأسها بسرعه..العذر لقاته منه هو أرتاحت شويه ورجعت ملامحها طبيعية
مروه : بالضبط هي كانت في الجامعة لما جت للحوش مالقتني أتصلت تطمن .
ناصف هز رأسه :باهي باهي..أنا جيت هنا بنسألك رضاعة عهد وين مالقيتها في الصالة! متأكده مخليتيها غادي!
مروه حطت يدها على رأسها:حيه صح صح في الدار متاع الضيوف
مسحت بيدها على ذراعه أبتسمت خايفه أرتباكها وتوترها: هي حبيبي توه نشوفها
طلعت من جنبه..وناصف تلفت يشوفلها لعند ما أختفت وخشت الصالة بحيره!
خشت لدار الضيوف خذت رضاعة بنتها ومشت لدار النوم طبقت وراءها الباب وقعدت على السرير حاطه يدها على قلبها: معناها ناصف طلع بدري
سكتت شويه وقالت بخوف وملامح جامدة..غمضت عيونها: معناها حوش أهلك مكانش وجهته الأولى .
ناصف طلع من المطبخ ومشى للدار فتح الباب..كانت ترضع في بنتها وساكته..ماسك بمقبض الباب بيديه ويشوفلها محتار فيها: أنا بنطلع للجماعة بعدين نبي نمشي للسوق ناقصتك حاجة ؟!
مروه ترضع في بنتها رفعت رأسها وشافتله مبتسمة:لا سلامتك.
أكتفى بهز رأسه وطلع لبرا...وأول ماطلع حطت عهد على السرير وغطتها مشت للدولاب نكتت حاجات ناصف كلهم مالقت شيء
**********************
عند أشرف
م 3:15
بعد بعث الرسالة ل مروه قعد يستنى في ردها طولت ماردت عليه وأختفت تقلب على جانبه الأيمن وأعطى هاتفه ل سلافه..خش على اليوتيوب وشغل قصة ليلة والذئب بدت تفرج عليها وكأنها أول مرة تشوفها.
قعد يتأمل فيها وفي وجها...أحيانا يشوف في حيان بوه ولكن سلافه كانت تشبه لحد كبير أمها..غمض عيونه ورجع بيه عقله ليوم ولادة التوأم من ثلاث سنين وبضعة أشهر
Flash back >>
أشرف قاعد في الدار متاعه يطلع في دبشه من الدولاب رن تيليفونه وكان بوه المتصل ما أنتبه له بعد وقت لقاه باعث رسالة ( تعالى نبيك ضروري )
