#جاموفوبيا((رهاب الزواج))
-(( الجزء السادس والعشرون)).
-((بعنوان السجن الدافيّ ))
كتابة؛ أم أمن ✨
"من أعظم مطالب الدنيا
كفاية الهم
ومن أعظم مطالب اﻵخرة
غفران الذنب
وهما مضمونتان
بالصلاة على النبي ﷺ
تُكفَى همَّكَ ويُغفرُ ذنبُكَ"❤
********************
عند عيت الناجي
مروه شافت لبوها مصدومة مش متوقعته يقول هك وأشرف طول تدارك الموقف لما قرب من بوه
أشرف: وسع بالك يا حاج مش هكِ.
تلفت عليه ورفع صبعه في وجه بغضب: مازال غير انت توريني شنو ندير وشنو مانديرش
وتلفت على ناصف بغضب: تعبت وانا يوميا نرقع في عمايلك السود وكل مرة عمله أحرف من الأوله 😤
نبي نعرف حاجه وحده بس كيف تجيب في السم هذا لحوشك كيف ترضاها وترضى مرتك وبنتك يشوفوه ويشموه ويعرفوه!
انا في عمري الي عشته كله و ستة وستين سنه موش شوية اهما عيالي الأثنين قدامك
عمري ولعت طرف سبسي قدام حد فيكم!!
حرك عيونه بين أشرف ومروه أشرف مطبس رأسه ومروه باين على وجها القلق والضيق: جاوب انت وياها؟؟
أشرف هز راسه بنفي: لا عمرك مادرتها ياحاج
رفع حاجبه مركز على مروه: وانت؟!
مروه رفعت عيونه وشافت لناصف بنظره خلاته يتمنى الأرض تنشق وتبلعه...وتلفتت على بوها: صاح كلامك يا بابا
الناجي رجع يشوف لـ ناصف: مع أنها عادة سيئة بلاني بيها ربي الا أني في حياتي ما دخنت قدام عيالي عارف عليش؟!
الناجي: لأني عارف العيال الصغار دماغاتهم زي الكمبيوتر يخزنوا الي يشوفوه ويرسخ في دماغاتهم، ويمكن بكره بعد يكبروا يديروا زيه ونعض صوابعي ندم عليها!
هز رأسه بأسف: اما أنت...أنت شنو درت ماشي جايب الخم**رة وسط حوشك لا هبت مراتك ولا هبت بنتك الصغيرة ياخي نقولوا لا تخاف ولا تحشم معقوله ماحطيتش في بالك بنتك تشربه...لكن الحق مش عليك الحق عليها
رفعت مروه راسها وشافت لـ بوها : الحق على هالمهبولة الي تجري في جرتك وعارفه عملك الأسود كله...وراضية أخرى!
الناجي قرب من مروه ورفع أصبعه في وجها...مروه مواطية راسها وتشوف للأرض معندهاش..وجه تشوف لبوها
الناجي : اليوم ربك نجاها البنية..الله يعلم بكره شنو يصير..كيف ماقتلك تبي تمشي معاه امشي نا مانمسك مراة على راجلها
