#جاموفوبيا (( رهاب الزواج ))
-((الحلقة الواحِد والخمسون الجزء الأول ))
-(( بعنوان صد ورد"صراعات داخلية" ))
لزخم أحداث هذا الجزء من الرواية
سيتم تقسيمه على عدة حلقات ثانية
(( نحن كبشر بطبيعتنا خطائين ..بس فيه أخطأ تغتفر وفيه أخطاء لا تغتفر ...أنا من أول فترة زواجي وأنا تغير على الوضع حياتي قعدت كلها تحت ضغط نفسي كبير..عشت أيام ما يعلم بيهم غير ربي..أيام مانبيش نذكرهم لان ذكرهم بس يخلي فيا نتعب بزيادة ..كانت مراحل وفجأة خشيت لامرحلة إنتقالية ثانية ..تغيرت فيها حياتي والضغط زاد عليا...مافيش حاجة تمشي كيف ما نبي زادت الفترة هذه تعب على تعبي ..يمكن أي حد من بعيد يقول اللي تمر بيه ساهل بينما هو أبدا مش ساهل مدام نحنا مش قادرين نعيشوا في المكان وتشوفوا الموضوع من زاوية نظر الشخص الثاني يبقى نحن مش قادرين نحكموا عليه ))
-كتابة أم أمن
قراءة ممتعة
**********************
تشوفله نظرته كانت تخوف وكأن قدامها حد ثاني مش نفسه أشرف اللي تأسرك من أول لحظة إبتسامته الهادية
عيونه قعدوا حمر...أرملة خوك ...وأم عياله...ومن هناء أدرك أشرف أن حسين ح يكون ديما بينه وبين هناء ...زي ما حاجات واجد ح يكونوا بينه وبينها
شافت لأعيونه بلعت رقيها ابتوتر توه هذا صحت للكلام اللي قالاته
قرب منها بسرعة وضغط على يدها بقوة: آااه يدي
شدها من ذراعها واضغط عليها بقوة كانت تتألم من ضغطته بلع غصته وقال بعصبية: خاربك هذا تضميه مش عارفه شن تخرطي ولا كيف الكلام اللي قلتيه هذا أقسم بالله لو حد ثاني كان يعرف شن يدير فيك 😤
هناء بلكلكة : أ أانا أناا اا
طلقها ودفها قدامه توازنت قبل تطيح رفعت عيونها فيه وكمل أشرف بصرامة رافع أصبعه في وجها ويهدد فيها: تعرفي أقسم بالله لو تعاودي كلامك هذا مرة ثانية نعرف شن نديرلك...مافيش داعي تذكريني على أساس معلومة جديدة عارف وضعك وعارف من يوم وفاته وإنتِ عند هلك و عارف المشاكل اللي ما تنتهي بكل مع مراة خوك والقصة اللي صارت مع حيان بس عشان هكي طلب مني بوي وقتها نردك بس أنا رفضت تعرفي عليش رفضت؟
سكتت تسمع فيه
كمل بعصبية يشوفلها : لأنك مستفزة ما تنطاقي
قرب منها وهي وخرت منصدمه فيه تكلم بحدة : مع هذا كله درتك بنادمة جبتك عندي إنت وعيالك ورديت بالي منكم تحملت تصرفاتك المستفزة وخشيت لادوامات وتلخبطت حياتي منك ومن هلك ومع هذا قلت ماعليش يا أشرف عقلها صغير وأنت الكبير وسع بالك لها وبإذن الله تنحل الأمور لكن شيء شيء إنت مافيش منك أمل
