#جاموفوبيا(( رهاب الزواج))
-((الجزء السابع والأربعون))
-(( بعنوان"إنهيار" ))
للكاتبة: أم أمن
السلام عليكم قراء رواية جاموفوبيا نعتذر عن الغياب؛اليوم الضي كان طافي من الصبح وبعد روح النت قعد فاصل بسبب الصيانة والأعمار
ما نطول عليكم قراءة ممتعة
( وسلِّم خوي )
سلِّم خوي، اللي مخاويه في الشدة ديما معايا،
أوقات أنادي عليه، وأوقات ماني من الندايا.
نا عارف ما نهون عليه، ولا يوم يخليني من الرجاية،
هو السند الي نتكي عليه ولو كان طحت يطيح معايا
و سلم خوي اللي مخاويه في الشدة ديما معايا
بقلمي أم أمن ♥
***********************
عند عيت الناجي
نورا كانت قاعدة في دارها على السرير وطارحه قدامها شيتها تقلب في الأوراق وتعدد على أصابعها نقاط مهمة في محاضرة اليوم سمعت صوت زغرودة أمها بعدين صوت بكى
وقفت ومشت جهة الروشن فتحاته وشافت خوها وأمها في الجنان وباكرة تبكي تمسح في دموعها وقتها عقلها مشى لمروه وخافت يكون صاير معاها شيء طلعت بسرعة برة الدار ومشت للجنان
نورا: يام شنو في
باكره مسحت دموعها وتباعدت عن ناصر شافت لانورا
باكره: مروه ناضت
نورا دمعو عيونها من الفرحة وقربت مصدومه منها: جديات يام
باكره هزت رأسها ودموعها ينزلوا من غير ما تتكلم قربت نورا من أمها وضمتها منهارة
باكره تمسح على ظهر بنتها: ما تبكيش عليش تبكي
نورا مسحت دموعها وناصر معاش قدر يتحمل طلع برة ومشى نهاية الشارع كان فاضي يبكي يبكي بروحه لأن كان يائس منها كلهم كانوا يائسين من أنها ترد زي قبل ولكن مع رحمة الله لا ياس
في شارع المستشفى
زحمة الشارع اليوم بزيادة مع الصبح كان راكن سيارته قدام عمارة صاحبه شويا ونزل عبيدة من الدروج يساوي في جاكته وطلع برة العمارة
أشرف لمحه دارله كلاكس تلفت عليه عبيدة ورفعله يده ( بمعنى شفتك)
وصل عبيدة في أشرف وفتح الباب وركب معاه ولع أشرف سبسيه وتلفت عليه: كنك طولت؟
عبيدة مسح وجه: يرا ما قبل سحبت روحي من بيسا ( بنت أخته شاديه )
أشرف شافله: كنها؟
عبيدة : سمعتني نحكي معاك بدري قالت تبي تشوفك
أشرف رفع حاجبه : وكنك ماخليتها تجي ولا تقعد ناقر عليها مني!!
