#جاموفوبيا ((رهاب الزواج ))
(( الحلقة الخمسون 1 ))
((بعنوان إنهيار /أزمة 3 ))
للكاتبة : أم أمن
ان خاصـه دواء نفديه ونطببله
مانكون وافـي كـان ما داويٰـته
نبقاله فقي ان عـازني نكتـبله
وندعي المـولي يلهمه عافيـته
ونبقاله فقي ان عازنـي نكتبـله
حتي وهو ضلال انـشوخ في زاويته
هـم الزمان ان جابـلي نشربله
نا وطن مـروي غـير مـن حنيته
زرارة الغلا من ودهـا تحلبله
خيرة المراح الي الهـا وازيته
امغير ايتلافـاني ونـلقي سـبله
بيش نعرفه مشـكاه من باديته
(منقول للأمانة الأدبية )
***************************
بعد ساعة وصلوا للمكان رفعت عيونها وأستغربت
أشرف فتح بابه وقال قبل ينزل : انزلي
لفتت وجها للقزاز وبغضب: انت ضحكت عليا اها
ربع يديه وطرمت شفاها: قتلك مش نازلة ورد بيا للحوش عليك كذبة كذبتك عليا
قبل يفقد اعصابه سمع صوت سيارة بحداهم تلفت لقاها جارهم في المزرعة ضغط على أسنانه بغيض: إنزلي هناء كلمة وحدة!!.
تلفتت عليه مازال مش مستوعبة ضحكته عليها: مش نازلة مش نازلة.
أشرف بصوت واطي: عليا الطلاق بالثلاثة كان مانزلتي إنت في ذمة روحك والعيال أقسم بالله حتى سمع ماعاد تسمعي بيهم.
كلمته صدمتها شافتله كانت نظرتها تقهر لوم وكره وزعل خفي وراء هالكره الكبير لأنها أمنت فيه ورخاها بعد تهديده نزلت من السيارة ماكان عندها حل ثاني مشت قدامه كم خطوة بدت توضح الصورة شوية هذه مدينة الأبرق وهذا أكيد حوش عيت عمها المزرعة
وقفت قدام السور الكبير جا من وراها وبيده مفاتيح المزرعة مر من جنبها وفتح الباب تلفت عليها وشافلها بلعت ريقها بصعوبة وخشت بعد خطوة خطوتين سمعاته قفل الباب جسم يبس وعقلها مشى بعيد أنتبه هو للشيء هذا
أشرف قرب منها : أسمعيني
تلفتت عليه بضيق : نعم
أشرف طلع المفتاح من جيبه وأعطاه لها مسكاته بين يديها بحيرة حك حاجبه وشافلها : أسمعي خشي للحوش جوه راهو نظيف مافيه حتى حاجة..بدلي كانك بتدلي وريحي روحك شويا عندي مشوار ومش مطول
سكتت وماردت عليها هزت رأسها بس وقتها عرف أنها ح تشيل منه واجد ومعاش تصدقه مرة ثانية
فاق من شروده بعد نادت عليه وهي واقفة على الباب
هناء غمضت عيونها : الباب ميبيش ينفتح
عقد حواجبه وقرب منها خذا المفتاح ودوره ودف الباب في الوقت نفسه أنفتح الباب : اهو فتح شافلها وهو ساكت خشت قدامه وخذت منه المفتاح وطبقت الباب في وجه
