#جاموفوبيا (( رهاب الزواج))
-((الجزء الرابع والعشرون))
بعنوان "ع أمل"
كتابة؛ أم أمن 🌸
صلوا على خير خلق الله واذكروني بدعوة ولو سرا 🌸
******************
4/1/2015 الأحد
الجو غائم من الصبح
10:30 صباحا
عند أشرف
وقت سكر من بوه ناض خذا تيليفونه وحاجاته
عبيده مقعمز مقابله: شنو عندك مشوار؟؟
أشرف هز راسه : اها أتصل الحاج توه...خلي نشوفه شن يبي.
ناض عبيده حتى هو: حتى انا خلي نلحق على طلبات العيال نوفرلهم كل شيء قبل مانمشي.
أشرف رفع راسه وشافله: يعني رسمي متبيش تخدم في مستشفى الثورة؟!
عبيده بضيق: تعرف اني ماتأقلمتش معاهم.
أشرف: يا سيدي إن شاء الله بالتوفيق وإن شاء الله ترتاح في المستشفى الجديدة.
عبيده: امين يا رب...مستشفى قروي يعني الزحمة مش واجد
أشرف: تمام بكل معناها، توه نستأذنك بنسقد.
عبيده: أذنك معاك يا غالي.
طلع أشرف ماشي لحوش بوه وعبيده قعد شويه وطلع وراءه
الناجي كان واقف يرجى فيه خشت سيارته الشارع مشى لولده فتح الباب وركب
تلفت عليه أشرف: خير ياحاج شن في؟!
الناجي والضيق بان على وجه: أتصلت أختك وقالت مرات المرحوم في المستشفى
عقد حواجبه: خير إن شاء الله.
الناجي مسح وجه وتلفت عليه: قالوا طرحت
أشرف تذكر موقف سابق: لاحول ولا قوة الا بالله،هذي أخرة الإهمال.
الناجي سكت شويه وتنهد: تسقد انت بيش نوصلوا غادي ونفهمو كل شيء
*******************
جامعة عمر المختار-القديمة
10:30 الجو غائم...وبدت ترشرش
الطلبه بدوا يخشوا للكليات
في الكافيتيريا وقدامه بنتين تستنى في دورها وكل شويه تشوف للساعة بيدها مازال ربع ساعة على المحاضرة
وحدة من البنات:لااا كيف هكي منبيهاش بسكر القهوة
صاحبتها: معليش نبو وحده ثانية
زفرت بضيق وتقدمت عليهن حطت الفلوس على الفترينة: معليش تره عطيني القهوة هذي واعطيني عصير فراولة والثاني مانجا
البنت شافتلها بنص عين: هييي دورنا
رؤى تلفتت عليهن قالبه عيونها: مش ماتبيش قهوة بسكر زيادة اهو خذيتها أنا بدال مايكبها
