#جاموفوبيا ((رُهاب الزواج))
- (( الجزء التاسع عشر "1"))
-بعنوان" أيام عُجاف، والأخير "
مفيش مشاعر مهما كانت ايجابية او سلبيه في حياتنا تخلق او تنتهي مرة واحد الموضوع تدريجي، حتى الأشجار الكبيرة ذات الأغصانة الكثيرة المتفرعة كانت في يوم بذرة بذرها شخص وسقاها على طول الفصول الأربعة أنتظرها لعند وصلت للي عليه الآن.
والقلوب هي الأخرى تعامل معاملة الأرض الي ح تزرع فيها بذارك ( حُب، وفاء، خيانة، شك، جفاء، كره) وترجى يوم حصادها، لذا إختار البذرة الصالحة بقد ما تقدر 🌿 تذكر الي زرع حيحصد زرعة
- أم أمن
الأحد - 2/5/2024
*******************
-عند عيت الناجي >
أشرف خش لقى هناء واقفه مع أركان أنصدم وتضايق وااجد هذي تستغفل في خوه والا شنو 😤
شافت أشرف أنفجعت وسحبت يدها من أركان...الأخير تلفت لوين تشوف هناء ويلقى أشرف ضحك بخبث وحسها فرصه سانحة ولازم يستغلها
والأوسكار مايعطى بس للممثليين الي يطلعوا على التلفزيون هابا لو ريتوا الي في الواقع 😁
أركان بان عليه التوتر وقرب من أشرف : أأأ كنت نسال فيها عن الحمام
يشوفله ومش فاهم عليش اصلا يسالها...أركان ركز انه مش عارفه بالاساس هو من مد يده : أركان عبد الحي الشريف
ولد عمة هناء ونسيبكم!
مد اشرف يده سلم عليه سكت شويه لكنه شك وفضت: الحمام مش هنا هيا معايا جوه!
وقف يشوفله أركان أرتبك وخش...بينما أشرف شاف ل هناء قرب شويه وقال بضيق: كان ولد عمتك احترمي خوي الزفت
خش وما أعطاها فرصه تبرر... زفرت بضيق هالصبح ياربي 😥
خش أشرف جوه وأركان تعمد يخش يقعد في وسط الرجالة بيش يزيد الشك في قلب أشرف
وهكِ صار خش قعد جنب حسين يضحك ويبصر مره مره أشرف متاكد انه ماخش للحمام ولا حاجه وهالأمر خلاه يشك في هناء وأنها مش سالكة
" هناء "
خشت للشقه وسكرت على روحها تلقاها من وين ولا من وين كبسة أشرف ولا جيت أركان وخلطته في أهل زوجها شن هالمشاكل الي جت وراء بعضها
مشت للدار طلعت قفطان بيتوتي واسع ودارت حمام على السريع طول الوقت خايفه من أشرف وخايفه يحكي لحسين هي صح ما غلطت بس تخاف ينكش حسين وراءها الماضي 😥
-تحت في المطبخ
كانت نورا واقفه وجنبها مروه تساعد فيها ومعاهن أحلام الي اتصلت بيها امها وكلمتها للغداء وبحكم قريبه عليهم جت على طول هك باكره متعوده وشارطه حتى الشرط على نسيبها بنتها تكون قريبه وحال الغايه بناتها كلهم قراب والمسافه عزقت حيطه
