#جاموفوبيا(( رهاب الزواج ))
-(( الجزء الثامن والثلاثون ))
-(( بعنوان"حافة الأنهيار" ))
كتابة: أم أمـن🌸،
*********************
( نهاية الحلقة السابقة )
هناء تلخبطت: مش لا ابدا
هز راسه وهو مبتسم بخبث ولثاني مرة يذوق طعمة نشوة الأنتصار ويلعب بنقاط ضعفها سكر الباب ومشى لحوش بوه طقطق عليه وطلعت حسنيه وعلى قد ما اصرت عليه يقعد الا انه رفض يخش جوه
طلعت بعهد وحاجاتها اول ما قرب أشرف من السيارة وبيده عهد فتحت هناء الشنطة لف وحط شنطة عهد لوراء ورجع بيها ركب السيارة واعطاها لاهناء
عطست عهد مسحتلها هناء بالمنديل: طار السو
بدت عهد تعطس..وهناء تمسح في خشمها طول الوقت..كان باين عليها مريضة عيونها ذابلة وطول الوقت كانت موسدة رأسها على صدر هناء تمص في صبعها
أشرف تلفت عليها: شنو مريضة؟
هناء مسحت على ظهر عهد: تعطس الباين متحسسة من حاجة
أشرف رجع يشوف قدامه: بالك هذا الي حاطته على فكرة راهو بنته تقلب الرأس
هناء أعطاته نظرة جانبية: بالك من بنة دخانك
تلفت عليها على السريع وسكت ( عنجد لسانك المتبرئ منك الزفت )
وصلوا لحوش أهله الدنيا هادية..والشارع شبه فاضي مفيش حد غير ناصر قاعد مع شاب في نهاية الشارع..نزل من السيارة وشاف لخوه بتركيز ..مشى للشنطة فتحها وطلع منها شنطة عهد ولف وفتح الباب طلعت هناء وخذا منها عهد
خشوا للحوش جوه وقف ماسك عهد ومقربها لاصدره وتلفت عليها
أشرف: اركبي لأفوق...شوية ولاحقك
هناء: تمام
ركبت هناء للشقة وأشرف خش للحوش..باكره كانت قاعده على سريرها ونورا مستنده على فخذ أمها تمسح على شعر بنتها وتتنهد في تنهيدات حارة
وكعادة حسين كان الغائب الحاضر في قلوبهن بالذات في المواقف هذه تكلمت نورا وعيونها مغمضات: خايفة من الفقد يا ماما وخايفة عهد يقعد مصيرها زي مصير سلافه وحيان
باكره مسحت على راسها: قولي خير يابنتي..وان شاء الله ربي يحن عليها وتطلع طيبة لبنيتها
نورا مسحت وجها: يا رب
أشرف كان قاعد قدام باب الدار تنهد بتعب وطقطق على الباب..تقاعدت مستغربة وشافت لأمها
نورا: زعما منو ؟
باكره: مايقعد الا أشرف بدري وصيته على بنت أختك
نورا ناضت ومشت للباب فتحاته..شافت بيده عهد قربت منه وخذتها: جبتها توه ؟
