#جاموفوبيا(( رهاب الزواج ))
-(( الجزء الثاني والأربعون ))
-(( بعنوان" إنهيار" ))
-للكاتبة: أم أمـن🌸،
- احفَظِ اللهَ تَجِدْهُ تجاهَكَ
***********************
واقفة قدامه مصدومه مش متوقعة منه طلب زي هذا صدرها بدأ يعلوا ويهبط للدرجة هذه يشوف فيها ساذجة..وعديمة مشاعر..وميت الأحساس غمضت عيونها بقهر
مرر عيونه على تعابير وجها..وهو في حالة صمت مش عارف ردة فعلها على الموضوع هذا نزل عيونه لصدرها واضح أن أنفاسها غير منتظمة وحركة أضلع قفصها الصدري واضحة
جت بين عيونها إتفاقيتهم ووقت قالت له شن مصلحته من الزواج منها...يعني المصلحة بانت توه وهو فعلا يبي ينتقم من بنت خاله بيها!
أنقهرت وقلبها تقطع على حالها الأغبر كل طيحة أسواء من الي قبلها..معاش قدرت تتحكم بعصبيتها وفيض مشاعرها الجارفة
ولكن كبرياءها هالمرة تدخل وأنقذها الأنهيار لكن هل ح ينقذها منه مرة ثانية ؟!!
هناء حاولت تتماسك: شنو ؟!!
تلخبط وقتها وقدر يحس بغضبها وإنزعاجها من طلبه هذا..غمض عيونه مسح شعره لوراء يشوفلها
أشرف بهدوء: زي ما قتلك بنت خالي فرحها بعد أسبوعين ونبيك تمشي
هناء ربعت يديها وبرفعة حاجب: ولو منبيش
نزل عيونه: إنتِ حرة..هذا شيء يرجعلك.
تضايقت منه أكثر لأن توه أشرف قاعد يكذب عليها وحسسها أن الموضوع مايهمه وهو باين عليه من عيونه مقهور عليها
هناء هزت رأسها: تمام معناها أنا منبيش نمشي
غمض عيونه وعض شفته بقهر وسكت
مرت من جنبه ومشت للمطبخ أستندت بيديها على الرخام وغمضت عيونها متبيش دموعها تفيض ولكنها ماقدرت وقت سمعت باب الشقة خبط بقوة قوة
عضت شفتها بغل..معقولة يعتبر فيها ساذجة للدرجة هذي..معقولة مايعرف أنها عندها علم بعلاقته ببنت خاله وحبه القوي لها..معقولة للدرجة هذي ماعنده أي مشاعر أي أحساس يبيها تحضر الفرح ومش هامه لا مشاعرها ولا خاطر عيال خوه
صوت نغنوشة تلفتت عليها لاقتها جايه لاعندها تنهدت بألم وقت عرفتها ناضت على صوت خبطت الباب مشت جهتها ورفعتها في يدها
تمسح على رأسها: حبيبتي قلق نومك هالمزعج
تنهدت ومسحت دموعها: يقهر الله يقهره
نزل من الدروج بسرعة معصب مايقدر يضغط عليها أكثر من هكي وبرضوا هكي ح تشهد نهلة واهلها على أنهياره ركب سيارته وقعد لاوقت يفكر وبس
