#جاموفوبيا (( رهاب الزواج ))
-(( الجزء الثامن والأربعون "2"))
-(( بعنوان أنهيار/أزمة 2 ))
للكاتبة أم أمن
قال الإمام ابن القيم- رحمه الله تبارك و تعالى - :
مَن أَحسنَ عبادةَ الله في شبابه ، أعطاه الله الحكمة عند كِبَر سِنه ، تأَمل قوله تعالى :
{ وَلَمَّا بَلَغَ أَشُدَّهُ وَاسْتَوَىٰ آتَيْنَاهُ حُكْمًا وَعِلْمًا ۚ وَكَذَٰلِكَ نَجْزِي الْمُحْسِنِينَ }
مفتاح دار السعادة (١٦٨/١)
*********************
عند عيت الناجي
كانت تحية مش متريحة لطلعت روان وراء مروه وخافت من المشاكل مع عيت عم بنتها قعدت على أعصابها وما قدرت تنوض باكرة تهدرز عليها
بعد شوية خشت رغد الصالة رغد وماسكه بيدها بنتها تعارك فيها لان وسخت روحها قعدت جنب أمها وفقدت روان
أمها مالت عليها وهمست في وذنها : الحقيها توه هذا طلعت وراء صبيتك راه تقوللها كلمة هكي والا هكي
رغد وجها أنخطف وناضت على طول وعطت بنتها لامها : خليه معاك مش معطلة
تحية خذت حفيدتها لحضنها : باهي
داخل الحمام طلعت مروه لقت روان قدامها كانت بتفوت وتمشي عادي كملت طريقها في الممر لعند ما وقفها صوت روان
روان تلفتت عليها : الحمدلله على سلامتك ، راجلي كان منشغل عليك بكل بكل
وقفت في مكانها ولفت على روان توسعت عيونها : بصدمة راجلك !!
قربت منها روان : على أساس ما عندك العلم
عقدت حواجبها : علم بشنو..بعدين راجلك شن دخله فيا ؟
أبتسمت بهزوة : والله بتديري فيها حركات وجو على أساس القطوسة المغمضة ولا لا وأنت هابا عليك
مروه بحده : إنت على أي أساس تحكي هكي ها ؟
خشت رغد : روان
تلفتو مروه وروان عليها بلعت رغد ريقها وخافت تقعد روان حكت لمروه أو قالتلها على الي صار
روان : نعم
رغد قربت منها وبتوتر مسكت في يدها : تعالي أمي تبيك تعطيها رقم خالتي خيرية
روان فهمت عليها : تمام جاية
طلعت رغد وروان مع بعضهم تحت عيون مروه الي مازالت تحت تأثير الصدمة ومش فاهمة شيء وشن علاقة راجل روان لاتوه مش فاهمة شيء
طلعت بيها برة وخشوا للدار التقعميز الفاضية
رغد بتوبيخ : هبلة إنت هبلة شن ماشية تديري فهميني ترا ؟
