#جاموفوبيا ((رهاب الزواج))
(( تكملة الجزء الخمسون))
(( بعنوان إنهيار / أزمة 3))
للكاتبة أم أمن
"خُذني إليكَ .. ولَو طَيفاً تُعانقهُ
إنّ كانَ شقّ اللقَا، أو شطَّت الطُرقُ
فالعاشِقانِ إذا جِسماهُما افْترَقا
تَفنى المسافات، و الأرواحُ تَعتنِقُ"
**********************
مالطا
بعد اللي سمعاته كانت مصدومة من كثر ما الموقف صدمها قعدت على السرير وبتكذيب: تحشمي على وجهك ياكوثر ولية كبيرة وتكذبي غير شكلك مش متفاهمة إنت وعمتي وجاية تديريلي مشكلة وتخربي عليا حوشي
لوت فمها بهزوة: ريت هالحوش العامر!!
كوثر كملت بجدية: ماعندي عليش نكذب عليك وما عندي فيها مصلحة نا صح مش متفاهمة مع عمتك بس عليش نبي نكذب من عندي على هناء شنو مصلحتي
نجاح بشك: وشن خطرها عليك اليوم تقوليها مش قلتي لها شهرين متزوجة شن خطرها عليك توة بالذات؟؟
ضمت شفايفها: حالي من حالك ماكنت نعرف شيء لعند سمعتها من نجلاء
نجاح توسعت عيونها بصدمة: نجلاء عندها العلم؟؟
هزت رأسها: عندها العلم إنت عارفة عمتك ما تدس شيء على طارق وطارق ما يدس على بنت خوي شيء
نجاح بغيرة من اللقطة كيف نجلاء اللي مازالت ما قعدت مراتهم بالرسمي عندها العلم وهي اللي أم ولدهم ولها سنين وسنين ماعندهاش العلم بالموضوع هذا
كوثر متشمته فيها: كيف صار أنصدمتي بالموضوع لاعند معاش تقدري تحكي
نجاح ضغطت على سنونها بغل: وهناء شنو دايرة معاه؟ متريحة مريحها ولا زي خوه؟
كوثر ما كان عندها العلم على اللي يصير مع هناء بس كانت بتولع النار في نجاح بالك تقول لاسعد: متريحة معاه وقاعده هي هناء القديمة..عايشة بين كفوف الراحة وغير ايش تبي بس يا هناء اللي تبيها كلها يدير فيها لها
نجاح قلبها نغزها: من هو فيهم؟ متزوج نازلة على ضرة؟
ضحكت ضحكة صوتها يسمع في حوشها نجاح تضايقت: تكلمي ياكوثر اللي ردها سلفها قيس ولا سلفها محمد؟؟
نجاح بتفكير: مراة قيس سمية ما حتى ردت عندهم مراة محمد هبلة ودرويشة اكيدة رددها سلفها محمد ولا لا
مبتسمة تسمع فيها: كملتي يا حنة.. لا ردها سلفها محمد ولا سلفها قيس ماحتى وافق طارق عليهم كبار واجد وصبيتك إنت عرفتها مازالت صغيرة وعويلتها صغار
قلبها ينبض بخوف: من اللي ردها أشرف؟
أبتسمت: باهي اللي عرفتيه..هو نفسه اللي تعارك مع سعد راجلك من قبل وصارت بينهم مشاكل منه
