#جاموفوبيا((رهاب الزواج ))
-(( الجزء السادس والأربعون ))
-((بعنوان "أنهيار" ))
للكاتبة؛ أم أمن
************************
عند أشرف
رزق الله تلفت وراه يشوف نوح : لكن أنت وينك
سمع صوت الباب على يمينه أنفتح تلفت ولقا طارق أنصدم
رزق الله : طارق !!
سمع صوت طقطقة على القزاز تلفت يساره لقا أشرف طبس عليه
أشرف بحده : والله نرجوا فيك تلايم على المنطقة..عظم الله اجرك في المرحوم
بلع ريقه بخوف ونباضات قلبه مسموعة: أجرك عظيم..ااا بس أنت من
أشرف وملامح وجه متجهمة : نا أخ مروه
ومد يده له من القزاز بيسلم عليه
صافحه رزق الله بخوف وقتها وأشرف ضغط على يده بقوة : شن حالك ياك طيب ؟
طارق يشوفله : كنك يا رزق ترعش مع بعضك
أشرف رحى يد رزق ورزق تلفت على طارق : أاا نا ما نرعش
طارق يشوف لرجليه الي يتصافقوا مع بعضهم
طارق : متأكد
رزق الله شاف لرجليه ضمهم ورغم هذا كله قاعدات يرعشوا من خوفه أشرف نفخ على وجه رزق الله
أشرف يشوف لرزق ويحاول يتحكم بأعصابه تباعد عن الباب ومشى للباب الي من وراء فتحه وركب
رزق حس برجليه ثقلوا وشاف لأشرف الي طلع سلاحه وحط الكاتم : كك كنك شنو تبي تدير
أشرف مال برأسه عند كرسي رزق الله : نبيك تطلع من هنا للبيضاء على طول أي حركة هكي والا هكي نوريك عليها راني مستبيع
هز رأسه والعرق ينزل من على وجهه زي المطر دور مفتاح السيارة وطلع من شحات للبيضاء
طارق كان يشوفله ومتضايق منه بكل معقولة رزق الله الي كلمه عشان ينقذ مروه وقت يجي الحق ويبيه يشهد ينكر الموضوع كله زعما يكون متفق مع حاتم من الأول..ولا زعما حاتم هدده بشيء ؟!
وصلت مكالمة وقتها لأشرف عقد حواجبه ورد عليها: أيوه..عقد حواجبه أمتى صار الكلام هذا..وشن صار توه باهي أمي معاهم..تمام لا شويا وجاي خليك معاهم ورد بالك عليهم..نفخ أوووف مشوار يا ناصر ضروري تعرف كل حاجة..تمام هي زي ما وصيتك رد بالك من الجماعة
سكر من ناصر وهو متلخبط بدأ قلبه مشغول عليها يبي يطمن عليها في أقرب فرصة..طارق ما أهتم لأن ما يعرف أنها أخته كل إهتمامه توه على موضوع رزق الله ويبي يعرف شنو الي صار بالضبط ليلتها ؟!!
مركز البيضاء الطبى
بعد ما وصل ناصر أمه وسارة وهناء للمستشفى قعد واقف في الحديقة قدام الباب حط يده في جيبه وطلع دخانة وهو يدخن ما يبيش يتصل على أشرف توه لعند يعرف شن صار بالضبط مع هناء
