".. مــاذا لـــو عــاد معتــذراً .."

part ..17

".. مــاذا لـــو عــاد معتــذراً .."

Part ...17

عند عزيز اللي مصمم انه مستحيل يترك خويه وحسين اللي خلاص الضيق صار محتويه
حسين : عزيز وانا اخوك لا تصعبها علي اكثر روح لحرمتك انا خلاص مافيني شيء وذا قدري ولازم ارضى فيه ..
عزيز : لو انت مكاني كنت بتترك خويك وتوأم روحك كنت بتترك اللي ماشي معاك من حين عرف الدنيا ذي وشقاها كنت بتترك اللي متواعد معاك من صغره مايعرسوا الا سوا كنت بتترك اللي ماشين ويا بعض بحلو الدنيا ومرها
انا بجاوبك بالذات انت ي حسين والله انك موب تاركني
عشان كذه اعتقد انك مالك الحق تناقشني ..
هنا حسين دمعت عينه من كلام عزيز والضيق اللي صار متراكم عليه و مسك ع كتف عزيز وقال ..
حسين : الله لا يحرمني مخوتك ي خوي الروح ..
هنا سعود يبغى ينجن يعني بالاول والاخير اللي بالسيارة وزوجها تاركها بتكون اخته وليث موب اقل منه
بس ليث كان عقلاني ويفهم بالمواقف
هنا سعود تحرك وجاء يبي يتكلم
الا ليث اخذه وهداه وطلب منه ينتظر لين يشوفوا ويش اللي بيصير ..

طبعا هنا كانوا حريم بيت ابو عزيز وحريم بيت ابو حمدان قد رجعوا لبيوتهم

ليث : اقول ي حسين يمكن يكون في سوء تفاهم خلنا ندق ع اهلة العروس ونفهم السالفه ..
حسين : موب انا اللي بيرجع يترجى احد مايبيه واقولك لا سوء تفاهم ولا شيء مع ان عمي ابو عزيز وخالي ابو حمدان موب مقصرين بس ع الاغلب اللي ماعنده ام واب مايقبلوا فيه يشوفوه الناس موب قد مقامهم عشان كذه قلبوها لولد عمها اللي عنده سند..
هنا الكل اقتهر وضاق ع حسين اكثر من بعد كلامه ..
ابو حمدان : موب وصية اختي اللي احد ممكن يضيق عليه ويغلط موب ولدي الثاني اللي احد ممكن يكسر بخاطره وموب ابو حمدان اللي يرضى الشين ع ولد اخته وموب ابو حمدان اللي يبخلي الليلة ذي تمضي و ولد اخته بدون عروس ..

هنا الكل استغرب ومافهم كلامه مع انهم اعجبوا بنخوة كلامه ..

طبعا الجد كان خلفهم ويسمعهم ..

ليث : ي عمي ابو حمدان كلنا مانبي الليلة ذي تخلص الا وحسين مع عروسته
بس انت تدري السوات اللي صارت وما باليد حيلة ..

حسين كان مبسوط ومرتاح من كلام خاله وحبه له ومن وقفة عزيز معاه..بس عمره ماتخيل ويش بيقول خاله ..
ابو حمدان : ي ولدي ي حسين انا قلتها كلمة قدام الرجال وانا عند كلمتي واليوم وبساعتنا ذي بقول كلمتي من جديد والكل يشهد اني بزوجك بنتي والليلة ذي بعد ..

الكل : وشووو
الكل في حالة صدمة ..
اما حسين مايدري اهو سامع صح او مخربط مع كثر الضيق والتعب
لا والله انا سامع خالي يقول بيزوجني نهى ..

الجد : عز الله انك نخوي وانك رجال ينشد به الظهر اي والله صدق اللي قال الخال والد الله يحييك ويحيي مقامكك اكثر ..

الكل كان يمدح بأبو حمدان
الا حسين اللي منصدم وموب قادر يقول كلمة فقط الدمع معبيه عيونه ..
تشجع وراح لقدام خاله ..
وابو حمدان كان يكلم بالجوال رجع سكر الجوال ولف
ابو حمدان : توني مكلم المملك وقال بيجينا الحين ..

انصدم ابو حمدان حين شاف حسين واقف امامه والدمع بعيونه كان بيتكلم بس قاطعه صوت حسين ..
حسين : تدري حتى قبل وفاة امي وابوي انت كنت سند لي ع طول
تتذكر حين كانت بثالث متوسط ونقصت عن الترتيب الاول 5 درجات وابوي وقتها عصب مني لأنه متعود يشوفني الاول وذي الامره ما احتفل فيني وانا شفت عزيز مع انه نقص اكثر مني واهله احتفلوا فيه وماعصبوا
انت بوقتها اخذتني لبيتك وسويت لي حفلة صغيره تدري واللي علي مقامك ان فرحتها بالنسبة لي كانت اكبر من فرحة تخرجي ما تدري انك جبرت بخاطري بذيك اليوم بصوره كبيره
والله اني يوم اشوف نفسي بالمرايا احب ملامحي اللي تقول عنها امي انها تشبهك
بس اليوم ي خالي كيف بوفيك ع اللي بتعمله معاي وقفتك معاي بالدنيا كلها انت جبت لي بنتك بدون علمها رضاها حتى انت شفتني ولدك
تدري من توفى ابوي وانا اشوف عزيز و حمدان واصل اسمعهم يقولون يبه يبه يبه واقول الله لا يحرمهم منها الكلمة
بس تدري انا بذي اللحظه تأكدت اني كمان ما انحرمت منها ي... ونزل راسه ورفع يديه يمسح دموعه بشاله
ي .. ي يبه ...وحضن ابو حمدان وبكى وخرج كل ضيقه وقهره لين حس انه ارتاح
الكل : الله يخليكم عزوه لبعض ..
وع شوي وصل المملك وخلصوا تمليك
ومابقى غير توقيع نهى, قرروا يأخذوا لها الكتاب عشان توقع ومن هناك تنزف لحسين ..
ابو ليث : انا اقول ي ابو حمدان لو نقدر نشاركك الشرف اللي نلته ونرسل حريمنا لبيتك يجهزون العروس لعريسها ويفرحونها شوي ..
ابو حمدان : الشرف والفخر اساسكم ..
الجد : وليث وسعود يأخذون امهم والحين يجيبون احلا فستان زفاف لبنتنا ..
هنا ابو حمدان يحمد ربه انه تعرف ع ناس اوادم وعندها نخوه وتفهم بالاصول ..
هنا لف حسين ع عزيز : تسلم ي اخوي اقول يكفي حرمتك تنتظر ..
سعود : انا برأيي نأخذ اختي والله طولت بالسيارة اساسا انت موب فاضي لها..
عزيز : اقولك خليك محظر خير اقلب وجهك ههههه
ليث : مافي داعي حنا نسوي شيء انت بس ادري كيف بتراضي حلوتنا ..
يلا سلام ..

راح عزيز وركب سيارته وموب عارف وشلون بيتصرف ويبرر موقفه ..

والكل طلعوا في السيارات
وعند رهف وهبه وملاك ومنيره:
الله يكون بعونها نهى شلون بترضى تتزوج بذي الطريقة ..

..

وصلوا بيت ابو حمدان وقرر ابو حمدان انه ينزل وحده بالاول عشان ماتنصدم نهى ..
دخل ابو حمدان البيت وسمع حس زوجته وبنته بالمطبخ راح للمطبخ ..
ابو حمدان : اوووووف اشوفكم من وصلتوا رحتوا ع المطبخ
ام حمدان : والله نهى تقول نسوي اي شيء ممكن يغير مزاج حسين واكيد ماتعشى قلنا نجهز عشاء حرام اللي صار فيه مايستاهل ..
نهى كانت تقلب بالعجين اللي مجهزته
ابو حمدان : بنتي ي نهى اذا ابوك طلب منك طلب بتنفذيه
نهى : انت ماتطلب يبه انت تأمر وانا ما اقول غير ابشر وتم ..
ابو حمدان : الله يبشرك بالجنة ويجعلني ابشرك باللي يسعدكك..
ام حمدان: خير ويش في ..
ابو حمدان : والله ي بنتي مدري كيف بقول بس ي بنتي انا اليوم ملكت لك ع ولد عمتك حسين
...

يتبع ...