".. مــاذا لـــو عــاد معتــذراً .."

part ..65

".. مــاذا لـــو عــاد معتــذراً .."

Part ..65

(..ولا تزعل ورب البيت ما اقصد
إذا ترضيك ما اقصد تسامحني .
لو أجمع كل دمعاتي لك بباقه
بتاخذ باقتك ماراح تأخذني .
حبيبي لو حبيبي كافية يكفي
بعدي هالحزن وياك ساعدني .
تعبت من الصور من عطرك المقرف
تعبت من الكلام أو لا كاتمني .
شقول اخطيت ما اخطيت لكني
إذا فعلا خطاء واخطيت عاتبني ..)

..

في قصر ابو صقر ..
ابو صقر قاعد يستفسر من فواز عن كل شيء بعدما علمه بالحقيقه وقاعد يسأله عن اسم جده واسم ابوه ..
و فواز كان يرد عليه باللي عرف عنه ..
وبـ لحظة ماسمعوا غير صوت ..

ام مشاري : مشاري ي ولدي يمه ..

فواز و صقر وابو صقر فزوا ع الصوت وابو صقر حس بنغزه بقلبه ..
بس صقر اللي متفشل من موقف مرت ابوه داخله قدام الرجال
اما فواز اللي فز من الصوت لأنه بعد يدري مافي احد معاهم اسمه مشاري وانصدم انه يشوف حرمه جاي ناحيتهم و هي كاشفة عن وجهها وتبكي, فواز من الاحراج عطاها ظهره ونزل راسه, ومايدري ويش اللي يحسه قلبه دقاته موب طبيعيه وصار يحس كل جسمه يرجف وصار متصبب العرق عليه ولا يدري بالضبط ويش اللي صاير ..
صقر راح لجنب ام مشاري مسك بيدها يبي يطلعها ..
صقر : خالتي اشفيك تعالي معاي لبرا ..
ابو صقر اللي فهم غطا ع عيونه بشاله و نزل راسه وقعد ساكت ..
ام مشاري وهي تبكي : صقر هذا مشاري ولدي والله ولدي ..
هنا كان فواز قاعد الكلام يطن بأذنه وهو قاعد يسمع ويحس اطرافه متثلجه رغم العرق اللي متصبب عليه و يحس بخنقه بحنجرته موب قادر ينطق و يحس دقات قلبه بتنفض صدره ..
صقر : خالتي ويش قاعده تقولين, موب ناقص هالرجال هالكلام تعالي معاي لبرا ..
ام مشاري : صقر ي ولدي تكفى افهمني, انا سمعته والله انا سمعته يقول قصته
ويقول ابوه مشعل وجده الشيخ فارع, انا سمعته يقول ان امه كذبوا عليها ان ولدها مات وماشافته انا سمعته يقول مشعل ظالم والله ظالم واجد, انا سمعته يقول ..
وبدأت تحكي وتروي اللي سمعته وتطابقه مع قصتها و فواز يسمع ودموعه بدأت تنزل و ابو صقر ع نفس حاله ما تحرك, وصقر لف وشاف حال ابوه هنا صقر بدأ يركز ويفهم ان ام مشاري صادقه و لف يشوف فواز اللي للحين مالف وبالاساس موب قادر يلف من اللي قاعد يسمعه و هو الحين يسمع صوت امه الحقيقي اللي هي بعد انظلمت مثله هي مثل فواز مالها ذنب ..
ام مشاري وهي تبكي و موب ماسكها الا صقر عشان لا تطيح
ام مشاري : مشاري ولدي مشاري يمه لف ع امك وشوفها تكفى ,طفي اللهيب اللي سكن قلبي من 27 سنة, تكفى ي ولدي انا مالي ذنب مثلك والله هم قايلين لي توفى اول ما ولدتك وقالوا قبروه بسرعه عشان لا يعرف ابوك حتى مكان قبرك ..
و انا وقتها قلت لخالتي ام مشعل كنت ابي اشوفه واعطيه اسم حتى لو متوفي ,بعدها حطيتك بقلبي مشاري و من وقتها وانا ام مشاري ..
هنا فواز لف شوي شوي الين صاير شايفها و دموعه هو بعد ما وقفت و الرجفه موب طبيعيه, هنا لاحظ عليه ابو صقر وفز بسرعه وضمه له عشان يهدأ
وهنا فواز ماعاد تحمل وبكى بكل صوته مثل طفل صغير تعب خلاص تعب من كل اللي قاعد يصير معاه ومن الحقايق اللي صارت ثقيلة بالحيل عليه و من حب قلبه اللي تاركه * رهف *
فواز وهو يبكي وهو بحضن ابو صقر اللي هو بعد متأثر وصارت دموعه نازله وماسك فواز بكل قوته عشان لا يطيح لأن الرجفه فيه موب طبيعيه
فواز : ااااااااااااااااااخ ,ااااااااااااااااااخ
ابو صقر : فواز انتبه ي ولدي امك مثلك مالها ذنب يكفي اللي صار لها بغيابك وتغربت وراحت عن ديرتها وانحرمت من طفلها, انتبه ي فواز مالها ذنب امك..