السعادة قسمة ونصيب❤️🥺

❤️🥺70

نهار جديد بروح جديدة وأحداث جديدة, واليوم يوم المناسبة الكبيرة والسعيدة ألى وهي عرس البنات,  العائلة مستعدة كل الإستعداد للإحتفال بسلوى وندى و الوقوف معاهم فهاد اليوم المجيد والقرار الصعب كثر ماهو صائب, هاد الزوجات اللي كانو صديقات وخواتات قبل مايفكرو أنهم فالأصل من نفس العائلة, شدو يدين بعض وختارو نفس المسار قراو نفس الشعب وفنفس المؤسسات لمدة طويلة عمرهم فكرو أنه يقدريجي شي نهار ويتفارقو فيه على بعضياتهم, وجهو بعضياتهم فأوقات الغضب والقلق, فالخطأ والصواب, فالفرح والقرح,  والضحك والبكاء, كانو شادين فيد بعضياتهم طول المعاناة القوية والمشاكيل الكثيرة والكبيرة اللي واجهاتهم فمسيرتهم العملية والحياتية وقدرو يعبرو على حبهم وصداقتهم ووفائهم لبعض بالأفعال وليس بالأقوال فقط, هاد الزوجات اللي وقفو مع بعض وكانو سند وكتف وظهر لبعض, حماو بعضياتهم وقدرو يواجهو شرور الناس اللي ضايرين بيهم, واليوم هاهوما واقفين فنفس البلاصة مع أزواجهم, نفس القاعة نفس اللباس نفس المصير ونفس المشاعير والأحاسيس, رغم  الخوف من مصير جديد وربما الرعب من حياة جديدة  أوالحزن من مفارقة ألاهل كاتبقى الفرحة لتواجد أحبابهم والأشخاص اللي بغاوهم وبغاو يكملو حياتهم معاهم حداهم وفجنبهم أكبر وأحسن من أي إحساس أخر...
   كانت نوال اللي داخلة معاهم يبدلو اللبسات وكانو آخر لبسات ليهم لليوم, نضراتهم لبعض كاتبيين الصداقة الفعلية ديالهم شحال كبيرة ومميزة, تدق الباب وهي تحل للدراري اللي دخلو باش ينزلو البنات, كانت لحضة صعيبة بزااف بالنسبة ليهم ونقدرو نقولو حتا لنوال لكونها شخص حساس من جهة عائلتها وأي حاجة تبكيهم تقدر تبكيها تاهي وكثر, قربات لنعمان ويمان يد البنات وهي كاتوصيهم من نييتها الصافية وحبها لبنات العائلة

نوال: اليوم هو يوم مغاير على باقي الأيام اللي عشتوهم, الليلة ليلة فرحكم ونقدر نقول ليلة غاتنتاهي بصباح جديد فحياة جديدة غاتعيشوها مع بعضياتكم وجنب بعضياتكم, غاتفيقو على صوت بعض وعلى وجوه بعض وغاتقدرو تتخاصمو مرة وزوج وثلاثة كيف ما تقدرو تضحكو كثر وتتفاهمو مع بعضياتكم, هاد الطريق اللي غاتمشيو فيها هاد الليلة هي طريق صعيبة كثر مما كاتصورو ولكن بحبكم واحترامكم لبعضياتكم غادي تقدرو تسهلوها, بغيت نوصيكم على أن الثقة هي أساس أي علاقة والحب والمودة والرحمة اللي غاتبيينو لبعضيياتكم نتيجة ثقتكم ببعضياتكم, بغيتكم تحبو وتعشقو بعض وتحافضو وتساندو بعض رغم أي مشكيل واجهكم, بغيتكم تكونو قويين وصبارين إستعدادا لهاد المسيرة الحافلة بالجهد والمغامرات والمفاجآت الغير متوقعة, زواجكم هاد الليلة وفرحكم  بغيتو يدوم ديما ونهار يوقع بيناتكم سوء تفاهم حاولو تسمعو لبعض وتتفهمو بعض وتتحاورو باش تقدرو تلقاو الحل, كونو صبارين قد ماقدرتو وكثر وحافضو على ثقتكم ببعضياتكم, كانتمنى تعيشو حياة سعيدة حافلة بالمسرات والأفراح وكانتمنى من الله يدوم المحبة بيناتكم  ويقوييكم على أي حاجة سواء كانت خايبة  أو زوينة,(شافت فالدراري بتحذير وعينيها ماليينهم الدموع) مانبغيش نسمع ولا نشوف شي وحدة بكات على يد شي واحد منكم حيت حسابكم غايكون معاي...