السعادة قسمة ونصيب❤️🥺

🥺❤️19

زياد:(رفع راسو فعيونها الدبلانين وملامحها اللي ماخدا منهم العيا لا حق لا باطل) هادا واجب عليا, فالأخير نتي بنت خالتي ومن العائلة مايمكنش نغطي عيني على هاد الموقف, وبالنسبة لسيرين فماتخافيش راه السجل ديالها غايبقا نقي غيل سوء تفاهم وصافي

نوال: مابقاش كايهمني بما أنها تلاقات بيه مرة خرا فما عندي مانديرليها, تقدر تسيير حياتها كيف بغات

زياد: ممكن تعاوديلي شنو الخطأ اللي دارت, وشكون هاداك اللي كان معاها؟؟

نوال:(حدرات راسها مخرجة تنهيدة من أعماق قلبها) طوماس, خو الطليق ديالى...

زياد:(للحضة شداتو اللقوة وماعرف مايقول, واش السيد اللي وصلات بسبابو نوال لهاد الحالة هو نفسو الشخص اللي باغي يشهد ضد خوه على قبل عائلتها, دخل ليه الشك وتفكيرو تخربق ديال بالصح) طوماس ريتش؟؟

نوال:(شافت فيه باستغراب, كيفاش حتا عرفو دون ماتفكر ولا ثانية سولاتو) كاتعرفو بعضياتكم؟

زياد:(مابغاش يزيد عليها بعدما عرفها بيلا غيل غادي تشطن وتفكر) لا ولكن عرفتو من خلال البحث اللي كنا درنا فقضيتك

نوال:(تنهدات براحة) أه مزيان

زياد:(بقا كيشوف فيها كيفاش كاتتنهد وكيفاش كاتشوف فالسقف دون حيلة) مهم نخليك ترتاحي أنا نمشي نقضي شي شغل ونرجع فيساع, يمكن ليك ترتاحي...(من تما خرج متوجه لمكتب الطبيب, فبالو أفكار عديدة لكن أولها أنه يعرف شنو سبب المرض ديالها وكيفاش حتا رجع, علاش وكيفاش تاحد فعائلتها ماعارف بمرضها من غير سيرين, وعلاش أصلا هوما مخبيين ملي جاو مابقا حد دوا على كيفاش تطلقات ولا علاش طلقات, شنو السبب اللي كايخلي نوال مخاصمة مع ختها ديما وشكون هو طوماس رغم أنه باغي يشهد لصالحها ولصالح العائلة ديالهم علاش نوال ماباغاش تشوف ختها معاه ولا حتا تشوفو هو نيت, عدة أسئلة مطروحة فعقلو المشتت لكن مواعد راسو من الآن فصاعدا غادي يحاول يقلب ويعرف كثر على هاد الإنسانة اللي دخلات لحياتو بشكل مفاجئ)

بالصح القدرشي مرات كايلاقينا فالطريق اللي حنا ظانينها أنها ملجأنا من العذاب ومنجاتنا من سخرية الحياة, ناسيين أن كل حاجة وكل أمر فهاد الدنيا مقدر علينا وماشي حنا اللي كانصنعوه بيدينا, الحروب والصراعات اللي كانعيشوها تقدر تعدبنا وتدمر كياناتنا في صمت, لكن تقدر تكون كذلك طريق أو سبيل للنجاة من حوايج مفاجئة ماكناش متوقعينها ولو مرة, البعض مننا كايحاول يعوض راسو بأشياء تافهة غيل باش يخرج من دوامة الصراعات العقلية والنفسية اللي كاتزورنا مرة مرة بسبب أخطاءنا الفادحة, في حين أن البعض الآخر كايواجه ظروف الحياة بالصمت والهدوء التام ليس ضعفا أو هزيمة  منه بل اسلوب من الأساليب الراقية اللي القليل منا كايعرفها وكايدرك قيمتها ونتيجتها ظنا من الاشخاص أن هاد الهادء والصامت تماما خائف أو شخص غير قادر على تحمل مسؤولية أقوالو جاهلين أنه يقدر يكون من الناس اللي كايعيشو مع جيش من المشاعر المتضاربة والجياشة, لكنه كايفضل السكوت حتا فالمواقف اللي محتاجة منو الهضرة والكلام...
وهادشي اللي ولاو ابطالنا كايعيشوه حاليا, مشاعر متضاربة وأفكار غير مفهومة واسئلة مبهمة, الطريق مسدودة فوجههم والدنيا ضحكات عليهم رغم أنهم كانو متوقعين منها تضحك ليهم, والحياة صدماتهم وفاجآتهم بأمور لم تكن فحسبانهم أبدا,...