فاتت مدة قصيرة حتا وصلو الدراري للكوميساريا, البنات باين فيهم الخوف والرعدة حيت خافو لاتكون غيل خطة من زيد بعدما عرف بيلا راهم دارو ديك الشوهة البارح بالليل والدراري أصلا كانو متأكدين من أن القضية ديال الضرب والبوليس هي اللي وصلاتهم لهنا لكن ماباغيينش يبيينو لجنة وجمانة شنو كاين, مادارو راسهم فداك المشكيل وماخباوهش إلا حيت متأكدين ومسولين على شنو دارو وعارفين العواقب والنتائج ديال فعالهم...
دقو الباب وتمو داخلين مع نفس الكوميسير اللي جاب لزيد الضوسي, وقف زيد وهو مخنزر حط الآلة ديال المحضر و وكلس بكل ثقة
ياسر:(شاف خالو كيفاش ساكت تما عرف راسو دارها كبيرة وخايبة) خالي..
جمانة: خالي شنو واقع؟؟
زيد:(شاف فيهم بكل سخرية وهو يضحك) شنو وقع ياك, والو غيل زوج من رجال الشرطة ڭراد تعرضو للضرب من طرف زوج دراري اللي هوما ياسر وعدنان
جمانة: احم خالي راه هوما اللي سبقو جبدونا...
زيد:(غوت حتا تزعزعو من بلاصتهم) واش داكم للبوليس واش عارفين شنو درتو واش عارفين شنو غايوقع دابا, ونتوما اااا مين قلتلك واش كاين شي حاجة هربتي وقلتي لا وأنا تقت بيك وزيد عليها تقت فيكم وقلت عندي رجال عارفين شنو كيديرو عارفين حدودهم لكن للأسف كنت غالط وماعرفتش بيلا راه عندي بنات الزنقة اللي يخرجو بالليل وشماكرية يتعداو على البوليس والمواطنين
جمانة: والله أخالي حتا فهمتينا غالاط هوما غيل حاماو علينا وماداروش داكشي بلا سبب
ياسر:(شدها من يديها مڭلسها براحة) صافي أجمانة سكتي, بما أن خالي ماتايقش فينا ماعندك لاش تعتادري على أفعالك
زيد:(شاف فيه بكل عصبية وهو يحط الضوسي بالجهد على المكتب وخرج مخلي السيد اللي مكلف بالمحضر ياخد الأقوال ديال كل واحد فيهم, متوجه للقاعة فاش كانت سيرين مع دوك الزوج اللي تضربو)
سيرين:(وقفات فور شوفتها ليه) راهم جاو واخا باقيين عيانين شوي, أنا نمشي عند الدراري نشوف شنو كاين,(شداتو فدراعو كاتهدنو حيت بالصح تعصب وعينيه مبيينين كمية العصب اللي راكبو) تكالما أحبيبة, كلشي غايكون بيخير ماتهزش الهم...
دازت وقيتة كاتتقارن بساعات وساعات, ساعات طوال كانو فيها البوليس اللي تضربو فقاعات مفرقين والدراري مع البنات كل زوج تاهوما فقاعة بعيدة على قاعة لاخرين, سيرين بقات مع جمانة وياسر كاتسمع ليهم بكل تمعن وكاتدرس كل قول من أقوالهم وهي كارزة على سنانها, عينيها مرة يتسدو بضيق ومرة يتحلو بصبر, حتا تسالات المدة وخرج كل من الشهود لقاعة وحدة ملاقيين مع البوليس اللي كانو مفرشخين بالصح, كل واحد كايشوف فلاخر وعينين بعض كايعبرو على الغضب والحدة جهة الغير, ياسر وعدنان اللي فور ماشافو البوليسيين تعصبو وجن جنونهم كون مالشرطة اللي شداتهم وسيرين اللي دوات معاهم كون زادو عصاوهم كثر من قبل, أما دوك الزوج اللي كلمة وصفة وهيبة شرطي مايستاهلوهاش مايستاحقوش حتا ديك اللبسة اللي لابسين
كيفاش شرطي غادي يصلح الوطن ديالو ويخدم البلاد ديالو ويحميها من الفساد والمشاكيل الإجتماعية والسياسية وغيرها وهو اصلا شريك فيها, شريك ومنخارط فالفساد الأخلاقي والإجتماعي ديال بلادو وهو بدورو كايتحرش ببنات الناس بكل جرأة وواخد حريتو من السلطة اللي تعطات ليه باش يحمي كل مواطن ومواطنة من التهميش والتحرش و....ولو تكون بنت الزنقة وبنت الحرام كان عليه يحميها ويفهم ليها أفعالها ويصلحها بلاصة ما يتحرش ويزيد الطين بلة, لكن للأسف كلشي ضاع وضاع كليا...
أنت تقرأ
السعادة قسمة ونصيب❤️🥺
Roman d'amourالشوق أضرم خافق الكلمِ ... فذوى فؤاد الشعر بالألمِ... البعد زاد الحزن في كبدي... و غيابكم أدى إلى عدمي... فَقلوبنا اشتدت مواجعها... و مراكب الأشواق كالحممِ... أو...
